Виликдай кIвализ газ гъун патал гьар са кIвалин иесиди газдин кьилин (магистральный) турбадилай вичин кIвалел кьван хсуси такьатрихъ турбаяр тухвана кIанзавай. Амма вири хизанрихъ и кар кьилиз акъуддай мумкинвал жезвачир. Нетижада хуьре газ жезвай, амма хейлин кIвалер адакай магьрум яз амукьзавай.
И месэла гьялун патал “Догазификация” тIвар алай программа кьабулнава. Адан куьмекдалди гьар са касдивай пулсуздиз вичин кIвализ газ гъиз жеда. И кIвалах кьилиз акъудунин карда МФЦ-дикай менфят къачуз жеда.
Кьилин шартI куьн яшамиш жезвай хуьре газдин магистральный турба хьун я. Эгер ам аватIа, кIвализ газ гъун патал квевай “Догазификация” программада иштиракун патал МФЦ-да арза кхьиз жеда. Лагьана кIанда, программадин куьмекдалди газ анжах хизандин ва кIвалин (карчивилихъ галаз алакъалу тушир) игьтияжра ишлемишун патал гъиз жеда.
РикIел хуьх: программада иштиракун патал МФЦ-да арза кхьидайла, куьн кIвалин ва я чилин участокдин иеси тирди тестикьарзавай документ ва ситуационный план герек жеда.
«Лезги газет»
