28-октябрдиз Махачкъалада Дагъустан Республикадин Халкьдин Собранидин 7-созывдин 4-сессия кьиле фена. Адан сергьятра аваз республикадин парламентдин депутатри РД-дин Гьукуматдин Председатель яз Абдулпатагь Амирханован кандидатура тестикьарна.
РикIел хкин, 27-октябрдиз РД-дин Кьил Сергей Меликова Дагъустандин Гьукуматдин Председатель яз хкягъун патал Халкьдин Собранидин депутатриз Абдулпатагь Амирханован кандидатура теклифнай. Сессияда иштиракай вири депутатри (85 касди) адан тереф хвена.
Къейд ийин хьи, А.Амирханован 59 йис я. Ам Хунзах хуьре дидедиз хьана. Хейлин йисара республикадин гьукумдин къурулушда жуьреба-жуьре къуллугърал кIвалахна. 2018-йисуз ам Кеферпатан Кавказдин крарин рекьяй РФ-дин министерстводин инвестицийрин проектрин департаментдин инвестицийрин рекьяй вилик финин отделдин начальник яз тайинарна. Эхиримжи вахтунда РД-дин Гьукуматдин Председателдин везифаяр тамамарзавай.
28-октябрдиз Сергей Меликова Абдулпатагь Амирханов Дагъустан Республикадин Гьукуматдин Председатель яз тайинарунин жигьетдай кьабулнавай Указдал къул чIугуна. Документда къейднавайвал, республикадин Кьили А.Амирхановаз РД-дин исполнительный гьукумдин органрин къурулушдин ва цIийи Гьукуматдин гьакъиндай теклифар гун тапшурмишнава. РД-дин Конституциядин 86-статьядал асаслу яз, Гьукуматдин Председателди и кIвалах вич къуллугъдал тайинарайдалай кьулухъ гьафтедин къене кьилиз акъудун лазим я.
«Лезги газет»
