И йикъара Татарстандин меркез Казань шегьерда женгинин самбодай 18-20 йисара авай жегьилрин арада Россиядин кIвенкIвечивал патал кьиле фейи акъажунра саки 300 спортсменди иштиракна.
Дагъустандин хкянавай командадик кваз ана чи халкьдин пуд векилдини чпин устадвал къалурна. Кьилди къачуртIа, Махачкъаладай тир Азизагъа Азизагъаев (64 кг-дал къведалди заланвал авайбурун арада) гимишдин медалдиз лайихлу хьана. Республикадин командадай мадни кьве спортсменди кIвенкIвечи чкаяр кьуна.
* * *
Чи мад са ватанэгьлиди — Исамудин Къурбанова (71 кг-дал къведалди заланвал авайбурун арада) — грэпплингдай ЦФО-дин чемпионатда гимишдин медаль къазанмишна. Гила ада Москвада мукьвара кьиле фидай уьлкведин чемпионатда вичин устадвал къалурда.
Чаз чир хьайивал, Исамудин Къурбанован ери-бине Дербент райондин Агълабрин хуьряй я. Ам Иваново шегьерда яшамиш жезва. Спортсменди тренер Сейфудин Гьуьсейнован (ам ЦIийи-Фригъдилай я) гъилик вердишвилер къачузва.
«Лезги газет»
