Уьлкведа пул къиметдай аватуникди арадал къвезвай гьаларикай (инфляция) хуьнин мураддалди дидевилин капиталдин кьадар гьар йисан 1-январдилай дегиш жезва.
Индексациядин кьадар РФ-дин Гьукуматдин къарардалди тайинарзава. 2021-йисуз дидевилин капиталдин кьадар 3,7 процентдин хкажна. 2022-йисуз 4 процент кьван хкаж хьун вилив хуьзва. И делилрикай чаз Махачкъалада кардик квай РД-дин МФЦ-дин кьилин идаради малумарна.
Эгер дидевилин капиталдин сертификат аватIа ва ам ишлемишнавачтIа, ана къалурнавай пулдин кьадар гьар йисуз гьукуматди тестикьарзавайдаз барабар жеда. Хизанди 2020-йисуз сад лагьай аялдиз къачур сертификат 2021-йисуз ишлемишиз хьайитIа, пулдин кьадар 483881 манатни 83 кепек я, гьа сертификат 2022-йисуз ишлемишиз хьайитIа — 503237 манат.
Эгер дидевилин капиталдин сертификатда къалурнавай пулдикай хизанди тамамдиз ваъ, са кьадарда менфят къачунваз хьайитIа, алава хъийизвай процентар анжах сертификатда амай пулдин кьадардиз талукь жеда. Эгер капитал тамамдиз ишлемишнаватIа, къведай йисуз адал кьил хкведач.
2020-йисуз ва адалай кьулухъ дидедиз хьайи кьвед лагьай аялар авай хизанриз гузвай капиталдин кьадар 639432 манат я. Яни кьвед лагьай аялдай гузвай капиталдин адетдин кьадардилай (483881 манатни 83 кепек) алава яз, сад лагьай аялдайни 155 550 манат чара ийизва.
Эгер сад лагьай аял 2007-йисан 1-январдилай 2019-йисан 31-декабрдал кьван муддатда дидедиз хьанватIа, амма кьвед лагьай аял — 2020-йисуз, ихьтин дуьшуьшрани кьвед лагьай аялдиз талукь яз гузвай дидевилин капиталдин пулдин кьадар 639432 манатдикай ибарат жеда.
«Лезги газет»
