Са тIимил йикъар идалай вилик Кьурагьа, хуьруьн стадиондал,  Вирироссиядин физкультурадинни спортдин комплексдин (ВФСК) ГТО-дин (Готов к труду и обороне) нормаяр вахкуниз талукьарнавай 5-чемпионат кьиле фена. Идакай Кьурагь райондин администрациядин сайтда хабар ганва.

Серенжем гьар йисуз Махачкъалада РД-дин физический культурадин ва спортдин рекьяй министерстводи кьиле тухузвай республикадин чемпионатдиз ухшамиш яз тешкилнавай. Адан макьсад (тешкилатчи — райондин физический культурадинни спортдин ва жегьилрин крарин рекьяй отдел) ГТО комплекс агьалийрин вири къатарин арада машгьур авун, физкультурадин жигьетдай абурун гьазурлухвал хкажун, хъсан нетижаяр къалурай ксар руьгьламишун тир.

Алай йисуз и серенжемда 18-далай 70 йисал къведалди ва адалай виниз тир яшара авай ксари, райондин кьил Замир Азизовани иштиракна.  ЦIи иштиракчияр, яшариз килигна, са шумуд дестедиз (18-24, 25-29, 30-34, 35-39, 40-44, 45-49, 50-54, 55-59, 60-64, 65-69, 70 ва адалай гзаф) пайнавай.

Чемпионат ачухуниз талукьарнавай шад мярекатдилай кьулухъ кIватI хьанвайбуру ГТО-дик квай жуьрейрай (60 ва 2000 метрдиз чукурунай, акъвазай чкадилай яргъаз хкадарунай, 16 кг-дин пут хкажунай­, снаряд (700 гр) гадарунай, ченеяр акъудунай, ацукьна ва я кIвачел акъвазна пневматикадин винтовкадай лишанар ягъунай ва икI мад) чпин алакьунар къалурна.

Мярекат санитариядинни эпидемиологиядин жигьетдай Роспотребнадзордин вири истемишунрал амал авуналди кьиле тухвана.

«Лезги газет»