7-мертебада

И мукьвара “Мавел” чапханади чи маш­гьур­­­ хва, РФ-дин яракьлу къуватрин ва МЧС-дин пол­ковник — гвардейчи, Чернобылдин Игит  Нисрет  Сейфуллагьович  Исмаилован  “Офицердин кхьинар” тIвар алай цIийи ктаб кIел­­­дайбурув агакьарна. Шак алачиз, ав­тор па­тал­ им нубатдин кьетIен кам, тебрикдай кар я.

15-октябрдиз “Лезги газетдин” редакциядин конференцийрин залда а ктабдихъ галаз таниш хьунин мярекат кьиле фена. Иниз Ниcрет Сейфуллагьовичан кхьинрал ашукь гзаф ксар атанвай. Виридалайни артух — автордин хуьруьнвияр, Махачкъала, Каспийск шегьерра ва масанра яшамиш жезвай фийивияр.

Квекай я офицердин кхьинар? Ктабдин кьили къалурзавайвал, ам, алай вахтунда от­став­када аваз, ял язавай полковникди вичин женгеринни къуллугърин рекьерикай ийиз­вай къейдер, рикIел хкунар — мемуарар хьун мумкин я. Чун рахазвай кIвалахдин са пай кхьинар, дугъриданни, гьа рекьериз талукьбур я.

Амма машгьур командир, виликдай акъуд­­­навай “Зи вахтунда”, “Ава дагълара ихьтин хуьр — Фий” ктабрилай тафаватлу яз, эхиримжи­ вахтунда кIелдайбуруз багъишнавай кьве ктабда (“Илиф, дустар!” ва “Офицердин кхьинар”) виливни хуьн тавур цIийи терефди­хъай ачух хьанва. Сад лагьайди, абур лезги­ чIа­лал кхьенва. Кьвед лагьайди, абур шииррикай ибарат я! Тажуб куь ийизва лагьайтIа, фийиви офицердин уьмуьрдин чIехи пай чи уьлкведин яргъал пи­пIера женгеринни жегьил­ аскерар тербияламишунин, Ватандин ва инсанрин хатасузвал хуьнин рекьера акъатна­ва. Яни ам, вичин хайи Фиярин хуьруьн ну­гъатдивай хьиз, лезги чIа­ла­вайни къакъатнавай. Амма ада гьа яргъара­ни неинки хуьруьн нугъат, гьакI литературадин нормайрин лезги чIални хвенва! Хайи чIалал фагьум-фикирзава. Вичин гьиссер образра, къешенг шикилра, сеслу цIарара твазва. Ашукь Шириналай гуьгъуьниз ада Фиярин хуьруьз ви­чин мани лагьанва! Гьа и  карди тIварар кьунвай­ ктабрал кIелзавайбурун фикирни желбзава.

Мярекатдин иштиракчийри: ам  ачухай ва кьиле тухвай чи газетдин кьилин редактор, шаир ва публицист  Мегьамед  Ибрагьимова, ктабриз редакторвал авунвай шаир ва публицист, “Лезги газетдин” литературадин ­отделдин редактор  Мердали  Жалилова,  кIел­­чияр тир  Буллух  Умудалиева, Суьгьбет Хурши­до­ва­, Къафар  Ризаева, Тарлан  Мамедова,  Ве­лихан  Велиханова,  Ализаде  Агъаширинова,  Явер  Рашидова, масабуруни Нисрет­ Сейфуллагьовичан яратмишунриз виниз тир къимет гана. Адан шииррин чIалан ми­хьи­вал, художественный такьа­тар хкягъунин дуьз­вал, гьикаятдин эсеррин тамамвал, къарагъарнавай месэлайрин важиблувал къейдна. Автордиз мадни цIийи агалкьунар хьун алхишна.

Мярекатдин кьвед лагьай пай Нисрет Сей­фуллагьович Исмаиловав чи республикадин жемиятдин тешкилатрин (Махачкъала шегьердин яшлубурун Советдин, генерал-полковник М.Танкаеван тIварунихъ галай жегьилар ватандашвилин руьгьдал алаз тербияламишунин Фондунин, Имам Шамилан тIварунихъ галай Фондунин) саналди тир къарардалди ганвай “Дагъустандин  Игит” тIвар алай орден вахкуниз талукьарна.

ЦIийи шабагьдин сагьиб тебрикиз винидихъ тIварар кьунвай тешкилатрин чIехи векилар: юстициядин генерал-лейтенант, Да­гъус­тандин Игит Т.Т.Бижамов, общественно-политический деятель, РФ-дин Госдумадин де­путатдин куьмекчи Гь.-Гь.Б.Абдулжелилов, къенепатан  кьушунрин отставкада авай  полковник Ф.А.Абдусаламов, школадин ди­ректор­ Гь.М.Давыдов, РД-дин МЧС-дин векил — инсанар къутармишдайди З.Н.Никомегьамедов, ДГТУ-дин профессор, цIийи затIа­рал чан гъизвай алим, “Чун яргъалди яшамиш жез халкьнава” ктабдин автор П.И. Исаев ва масабур рахана.

Эхирдай Нисрет Сейфуллагьовича вичин­ яратмишунриз ва жегьилар тербияламишунин рекье къачунвай камариз чIехи къимет гунай гьам чи общественный тешкилатрин сагьибриз, гьам республикадин руководстводиз, “Лезги газетдин” редакциядин  коллективдиз, атанвай вири мугьманриз сагърай лагьана. Мярекатдикай “Вахтар ва инсанар” программадин журналистри махсус лент гьазурнава, ам  телеканалдай къалурда.

Мерд Али