14-октябрдиз чи илимдинни яратмишунрин, жемиятдинни сиясатдин векилрив чIулав хабар агакьна: яргъалди чIугур залан азардикди машгьур алим, физикадинни математикадин илимрин доктор, профессор, лезгийрин “Садвал” гьерекатдин активный иштиракчийрикай ва адан регьберрикайни сад хьайи хкемви хва Гьажи Асланович Абдурагьимов рагьметдиз фена. Ам чидай дустари, мукьва-кьилийри, багърийри яс чIугвазва, сада-садаз сабурар гузва.
Гь.А.Абдурагьимов 1936-йисан 15-декабрдиз Ахцегь райондин Хкем хуьре муаллимдин хизанда дидедиз хьана. Гимишдин медалдалди Дербентда юкьван школа, 1961-йисуз ДГУ-дин физикадинни математикадин факультет акьалтIарна, ДГПУ-да кIвалахиз эгечIна. 1967-йисуз илимрин кандидатвилин, 1987-йисуз илимрин докторвилин дережаяр хвена.
ДГПУ-да хейлин йисара теоретический физикадин кафедрадин, ахпани нанотехнологийринни микроэлектроникадин НИИ-дин кьиле хьана.
Бажарагълу алимди тIварар кьунвай хилерай физикада хейлин цIийи шейэр арадал гъана. КIеви шейэри (кристаллри) чпи чпиз таъсир авунин рекьерикай (сирерикай) вишелай виниз илимдин кIвалахар кхьена. “Кристаллрин ва эпитакиядин винел пад” монографияди ам Вирироссиядин ва дуьньядин физикрин арада машгьурна.
Инсандин психофизикадинни руьгьдин философиядин ва маса месэлайрай ада гекъигун авачир хьтин ктабар: “Уьмуьр ва ажал ва мад сеферда уьмуьр”, “Чи кьисметар чна арадал гъизва” кхьена, чапдай акъудна. Сад лагьайда Сочида кьиле фейи илимдин лап хъсан ктабрин конкурсда (2006-йис) сад лагьай чка кьуна, автордикай а конкурсдин лауреат хьана.
Профессор Гь.А.Абдурагьимован илимдинни педагогвилин кIвалах, агалкьунар адаз “СССР-дин ва РФ-дин халкьдин образованидин отличник” “СССР-дин лайихлу изобретатель” лагьай гьуьрметдин тIварар ва маса шабагьар гуналди къейдна.
Гь.А.Абдурагьимова вичин руьгьдин гзаф къуватар чи халкьдин тарих, этнография, культура ахтармишуниз, халкьдин садвал арадал хкуниз бахшна. И жигьетдай ада кхьей ва Санкт-Петербургда чапдай акъудай “Кавказдин Албания — Лезгистан: тарих ва алай аям” ктаб гьар са лезги хизанда герек, гьакьван важиблу месэлаяр веревирднавайди я. Идалай гуьгъуьниз маса чIехи ктаб — “Лезгияр ва чилин винел сад лагьай цивилизация” кIелзавайбуруз багъишна. 2013-йисуз алимдин къелемдикай лезгийрин тарихдиз талукь мад са ктаб хкатна: “Заратишр, албанринни лезгийрин этнос ва Яран сувар”.
Чна рагьметлудан хизанриз, вири мукьва-кьилийриз, дериндай хажалат чIугунивди, башсагълугъвал гузва. Гьажи Асланович Абдурагьимован экуь къамат садрани чи рикIелай алатдач.
“Лезги газетдин”
редакциядин коллектив
