Алатай гьяддиз, 9-октябрдиз, Махачкъалада, РД-дин здравоохраненидин министерстводин дараматда, Росздравнадзордин ва СКФО-дик акатзавай республикайрин здравоохраненидин министверствойрин векилрин иштираквални аваз агьалияр кьиникьин дуьшуьшар тIимиларуниз ва демографиядин гьалар хъсанаруниз талукьарнавай совещание кьиле фена. Идакай “Лезги газетдиз” РД-дин Гьукуматдин пресс-къуллугъди хабар гана.
КIватI хьанвайбурухъ, гьа гьисабдай яз маса регионрай атанвай мугьманрихъ, элкъвена сифте гаф рахай Дагъустандин Гьукуматдин Председателдин заместитель Мурад Къазиева совещанидал веревирдзавай месэлаяр уьлкведин ва республикадин кьиле авай ксар патал эвелимжи нубатдинбур тирди къейдна.
Совещанидал СКФО-да кьиникьин дуьшуьшар тIимиларунал гьалтайла виридалайни кар алайбур яз гьисабзавай беденда иви къекъуьнин (кровообращение), нефесдин органрин ва онкологиядин хилер веревирдна. ЦIийи коронавирусдин тIугъвал фад амаз диагностика авун таъминарунин ва ковиддикди рекьизвайбурун кьадар тIимиларунин месэлайрал кьилди акъвазна. Росздравнадзордин регьбердин заместитель Ирина Серёгинади агьалияр тIугъвалдикай хуьнал гьалтайла, азардиз акси раб ягъунихъ еке метлеб авайди ва и раб ягъунин нетижада уьлкведа инсан кьейи са дуьшуьшни авачирди къейдна.
— Электронный къайдада “Фармаконадзор” къурулушдиз уьлкведин вири духтурривай вакцинадиз талукь малуматар агакьзава. Къенин юкъуз вакцина ягъайдалай кьулухъ гьал пис хьуникди кьейи дуьшуьш малум туш. Чна духтурривай гзаф тIалабзава, вакцинадин чIуру таъсирдиз талукь хабарар и къурулушдиз агакьарун. Ихьтин къурулушар Европадин вири уьлквейра ава. Абуру гузвай малуматрал асаслу яз, и ва я маса дарманрин, гьа гьисабдай яз азарриз акси рапарин жигьетдайни, абур ишлемишунихъ галаз алакъалу месэлаяр веревирдзавайди я, — алава хъувуна И.Серёгинади.
РД-дин здравоохраненидин министрдин везифаяр вахтуналди тамамарзавай Жавгьарат Исаевади кьиникьин дуьшуьшар тIимиларун патал Дагъустанда жуьреба-жуьре органар ахтармишунин Ачух ракIаррин йикъар кьиле тухун эхиримжи са шумуд йисуз хъсан адетдиз элкъвенвайдакай, и карди онкология сифтегьан стадийра чириз куьмекзавайдакай лагьана.
Совещание кьиле фидалди вилик Москвадай ва СКФО-дин маса регионрай атанвай мугьманриз Республикадин перинатальный центрадин кIвалахдихъ галаз таниш жедай мумкинвал хьана. Росздравнадзордин регьбердин заместитель Ирина Серёгинади центрадин, кьилди къачуртIа, интенсивный терапиядай симуляционный классдин, таза аялрин реанимациядин ва телемедицинадин рекьерай кIвалахдиз виниз тир къимет гана.
Рагнеда Рамалданова
