Чи ватанэгьлияр — гьар сана
Хуьре чIехи хьана, кьисметди жуьреба-жуьре шегьерриз акъуднавай, чпи багъри накьвадихъ ялзавай, ватандин мублагьвиликайни абадвиликай фикирзавай ксарикай чав мукьвал-мукьвал хабарар агакьзава.
И макъалада заз гьахьтинбурукай сад тир, Томскдин областдин Стрежевой шегьерда кардик квай “Стрежевское вышкомонтажное управление” эцигунрин ва промышленный тешкилатдин (ООО) генеральный директор, меценат Бейбулат Айдунович Алихановакай, ада вичин хивез къачунвай мергьяматлу кардикай куьруь ихтилат ийиз кIанзава.
Ам 1975-йисан 9-майдиз Ахцегь райондин Цуругърин хуьре дидедиз хьана. Хайи хуьруьн мектебда 8-класс куьтягьайдалай кьулухъ Белиждин 8-нумрадин СПТУ-да кIелна. Гуьгъуьнлай яракьлу къуватрин жергейра къуллугъ кьилиз акъудна, гьа са вахтунда Пермь шегьердин военный кьилин училищедикни экечIна. Къуллугъ ва кIелунар акьалтIарай жегьил Дагъустандиз хтана, эвленмиш хьана. Дербент шегьерда эцигунрин ва эцигунрин материалрин бизнесдал машгъул хьана. Кьисметди ам 1999-йисуз уьлкведин кефер патаз акъудна. Ина ватанэгьлиди эцигунрин “Центр” тешкилатда прорабвиле кIвалахна. Алакьунар ва тежриба къалурай пешекардиз “СНПС” (Сибнефтепроводстрой) ООО-дин директордин заместителвилин къуллугъ теклифна ва ина кIвалах давамарна.
2007-йисуз Б. Алиханова Томскдин областдин Стрежевой шегьерда “Стрежевское вышкомонтажное управление” эцигунрин ва промышленный тешкилат арадал гъана ва а чIавалай инихъ нафтIадин турбайриз, буругъриз талукь эцигунрин хиле кIвалахзава. Адан карханада алай вахтунда уьлкведин жуьреба-жуьре регионрай 120-далай виниз ксари кIвалахзава. Компания эцигунра ишлемишзавай металлдин материалрин монтаждал, гьакIни Роснефть, Газпромнефть, Лукойл, БКЕ-Евразия тешкилатар патал буругърин материалар монтаж ва демонтаж авунал машгъул я.
Чаз малум хьайивал, Цуругърин хуьруьн мискIин цIийи хъувунин месэла Бейбулат Алиханова вичин хивез къачунва. Алай вахтунда мискIиндин къав саки акьалтIарнава, къе-пака къенепатан кIва-лахривни эгечIдайвал я. И кар тамамдиз кьилиз акъудун патал Бейбулата 3 миллион манатдив агакьна такьатар чара ийизва.
“Жуван ватан кIан хьун, дувулар рикIелай алуд тавун, Аллагьдихъ инанмиш хьун гьар са мусурмандин асул лишан я. Къени фикирралди гьар сада хийирлу кардик са “стIал” кьван вичин пай кутуртIа, нетижада “гьуьл” арадал къведа. Жуван халкьдиз бахтаварвал ва къулайвал хьун зи мурад я”, — лугьузва ватанэгьлиди.
Б.Алиханован хизанда кьве велед чIехи хьанва: хци СМГУ-да кIелзава, руша — САМГТУ-да.
Халкь, Ватан патал кьилиз акъудун патал баркаллу цуругъвидин фикирдик мадни бязи крар ква. Къуй ватанэгьлидин къени мурадар, къастар вири кьилиз акъатрай!
К. Ферзалиев
