Махачкъаладин мектебда 11-октябрдиз арадал атай акьалтIай нагьакьан агьвалатди къалабулух кутун тавур кас бажагьат амукьна.  9-классда кIелзавай аял чIехи мектебдиз чукIул гваз фини, адаз и жигьетдай манийвалдай, и кар къадагъа ийидай кас тахьуни мадни тажубарзава. Амма арадал атанвай мусибатдин­ агьвалатдин тахсир тек и делилдин “хиве тун” дуьз туш, гьелбетда.

Мектебриз азадвилелди яракьар гваз бандитар, кьиле чIуру къастар авай террористар гьахьай дуьшуьшар эхиримжи вахтара тIимил жезвани? Амма вилик пад кьаз алакьзавач.

Образованидин тешкилатрин кьиле авайбуру, абурал гуьзчивал тухузвайбуру идарайра хатасузвал таъ­ми­нарун сифте нубатдин месэла яз гьисабзава. Амма яракьламиш хьанвайбурун хура акъвазиз жедай хьтин “хатасузвал” гьи мектебда таъминарнава? Ихьтин дуьшуьшра тахсир тамамвилелди образованидин идарадин жавабдар ксарин хиве тун гьахълу кар жезвач.

Мердимазарвилин гьерекатар давам тахьун патал мектебар  яракьламишнавай къаравулрин гуьзчивилик кутун чарасуз я. Адетдин къаравулривай гуьллейринни чукIулрин хура акъвазиз жедач, абурун къуватсузвал чизвайвиляй дараматдин къенез рикIе чIуру къаст авай кас са четинвални авачиз гьахьда.

Агьвалатдихъ галаз алакъалу яз соцсетра дагъус­танвийри жуьреба-жуьре фикирар кхьизва. Гзафбуру­ фикирзавайвал, мектебра авай жегьил несилдин диде-бубайрик чпин веледриз кьадарсуз “азадвал” гуз­вай­бур, пис-хъсан чир тийизвайбур ква. Исятда мектебра кIвалахзавай муаллимарни ахьтин ягьсуз аялри инжиклу ийизвай дуьшуьшар гзаф жезва. Ибур вири къудур, къизмиш хьунин нетижаяр я. Чпин веледриз “садахъайни кичIе жемир, къванцивни ягъ, чукIулдивни ягъ” лугьуз, “насигьатар” гудайбурни авачиз туш.

Зи фикирдалди, МВД-дин шериквал аваз къаравулрин жигьетдай цIийи жуьредин къурулуш арадал гъунин чарасузвал ава. ЧОП-ривай мектебар лазим тирвал хатасузвилелди таъминариз жедач. ГьакI тIвар патал тайинарнавай къаравулар ваъ, гьакъикъи къаравулар хьайитIа, мектебдин къенепатани къалмакъа­лар жедач, анриз аялар чукIулар ва къадагъа авунвай маса затIар гваз фидач. Мукьвал-мукьвал арадал къвезвай чIуру нетижайри къалурзавайвал, образованидин тешкилатар гьакъикъи хатасузвилелди таъминарун девирдин истемишун я.

К.Ферзалиев