Играми дустар! 15-ноябрдалди уьлкведа агьалийрин перепись кьиле физва. Тарихда сифте яз, чаз кIваляй экъечI тавуна, интернетдин куьмекдалди, «Госуслуги» порталдин куьмекдалди, переписда иштиракдай мумкинвал хьанва. Зани гьа и къайдада авуна.

Тахминан 10 декьикьадин къене за вири суалриз жавабар гана. Суалар гьар жуьрединбур я: яшамиш жезвай чкадиз, образованидиз, хизандиз, кIвалахдиз, миллетдиз ва са жерге маса месэлайриз талукьбур.

Зи фикирдалди, чакай гьар сада и переписда иштиракна кIанда. За къейд авурвал, суалрин арада «Гьи миллетдин векил я?» лугьудай суални ава. Ша чна чун пара авайдакай хабар гун!

Вилик йисара тухванвай переписдин нетижаяр гьакъикъи гьаларихъ галаз кьан тийизвайбур тирдакай, бязи халкьарин кьадар – тIимиларнавайдакай, бязибурун гзафарнавайдакай парабуру чпин фикирар лагьанва. Са гафуналди, переписдин рекъемрал шак гъизвайбурни авачиз туш.

За гьисабзавайвал, переписда «Госуслуги» порталдин куьмекдалди иштиракайтIа, кьасухдай тIимилардай, гзафардай мумкинвал садахъни жедач. ГьикI лагьайтIа, и къайдада жувакай тазвай делилар арада са арачини авачиз гьасятда Росстатдин идарадив агакьзава.

Переписда иштиракун гьар са агьалидин гражданвилин буржи я. За переписда иштиракнава. Куьне иштиракнавани?

Мегьамед Ибрагьимов