Дагъустанда “КIелунал рикI алай диде — кIелунал рикI алай уьлкве” кьил ганвай проект кардик кутунва. РД-дин образованидин ва илимдин министерстводин куьмекдалди ам тешкилнавайди Дагъустандин дишегьлийрин союз я. Проектдин бинеда мектебра кIелзавай аялри ктабар кIелуниз ийизвай итиж артухарунин кардал абурун диде-бубаяр желб авун, и рекье санал кIвалахун ава.
Ктабар кIелдайбур фикирда кьуна туькIуьрнавай проект уьмуьрдиз кечирмишун четин хьунин ва библиотекаррин кIвалахда гьалтзавай месэлаяр и йикъара Къизилюртда кьиле фейи гуьруьшдал веревирдна. Мярекатда Дагъустандин дишегьлийрин союздин председатель Интизар Мамутаевади, РД-дин образованидин ва илимдин министерстводин умуми образованидин отделдин меслятчи Кинаят Юнусовади, ДГУНХ-дин тербиядин рекьяй директордин заместитель Айна Сеидовади ва са жерге маса пешекарри ва аялрин диде-бубайри иштиракна.
Эхиримжи вахтара ктабар кIелунал рикI алай ксарин кьадар вири дуьньяда са кьадар тIимил хьанва. Гзафбуру гьисабзавайвал, компьютеррин технологияр виликди тухузвай девирда аялар ктабар кIелунал желб авунихъ метлеб авач. Ктабар телевизорри, компьютерри, телефонри эвезнава. Гьа са вахтунда, хизанда ктабар кIелунин адет арадал хкун — им къенин йикъан кар алай месэлайрикай сад я, вучиз лагьайтIа, диде-бубайризни аялриз садаз масадан “ван къвезмач”, арада чан алай рафтарвилер, ихтилатар, суьгьбетар амач. Диде-бубайри аялрихъ галаз санал ктабар кIелун, пешекарри гьисабзавайвал, эдебиятдин, марифатдин тербия гунин серенжемрикай сад я.
“Ктабар кIелунал рикI тахьуни аялдин неинки руьгьдихъ галаз алакъалу, гьакIни яшайишдин ва экономикадин хилерал гелер тазва. Уьлкве ктабар кIелдайбурун рекьел хкунин месэла дишегьлийрин хиве гьатнава, вучиз лагьайтIа, анжах дишегьлидихъ, дидедихъ хьиз, веледдин рикI ктабар кIелунал желб ийидай виридалайни гзаф мумкинвилер ава”, — гьисабзава Кинаят Юнусовади.
Къейд ийин, октябрдилай Вирироссиядин “КIелунал рикI алай диде — кIелунал рикI алай уьлкве” конкурсдин муниципальный пайни башламиш хьанва. Конкурсда неинки дидейривай, бубайривай, гьакIни чIехи дидейривай ва бубайривай иштиракиз жеда.
Конкурс пуд номинациядай кьиле физва: аялрин шикилрин “Диде — махарин игит”, видеороликрин “Дидеди кIелзава” ва видеороликрин “Хизандин кIелунар” . Нетижаяр 2021-йисан 25-октябрдиз кьада.
«Лезги газет»
