Сингапурдикай итижлу делилар

—           Сингапур республика 63 островдикай ибарат я. Бязи гъвечIи островра инсанар яшамиш жезвач.

—           Сингапур дуьньядин виридалайни гъвечIи 20 уьлкведин жергедик акатзава. Адан мулкарин умуми майдан 715 квадратный километрдикай ибарат я. (Ге­къи­гун патал мисал гъин: Санкт-Петербургдин умуми майдан 1440 квадаратный километр я).

—           Сингапур шегьерни я, уьлквени.

—           Агьалияр сихдаказ яшамиш хьунин жигьетдай Сингапур кьвед лагьай чкадал алай гъвечIи уьлкве я.

—           Сингапурди дуьньядин 186 уьлкведихъ, гьа жер­гедай яз Россиядихъ галазни амадагвилин алакъа­яр хуьзва. Амма виринра векилханаяр кардик квач. И уьлкве ООН-дин член я.

—           Сингапурда 4,5 миллион кьван инсанар яшамиш жезва. Агьалийрин 78 процент — китайвияр, 14 процент — малайзиявияр, 7 процент индусар я. Ана са кьадар европавиярни, 400 кас кьван урусарни яшамиш жезва.

—           Малайский чIал Сингапурда милли чIал яз тес­тикьарнава. Амма официальный кьуд чIал ава: ингилис, китай, тамильский ва малайский.

—           Уьлкведин са пай тарарини милли паркари кьунва. Ана тропикрин хейлин къушар яшамиш жезва.

—           Сингапур экономикадин рекьяй вилик жергейра авай уьлкве я.

—           Сингапурда куьчейра полициядин къуллугъчияр саки жедач, амма виринра камераяр кардик кутунва.

—           Наркотикар маса гузвайбуруз Сингапурда кьиникьин жаза гузва. Анаг дуьньядин виридалайни хатасуз уьлквейрикай сад я.

«Лезги газет»