Алатай саласадиз СтIал Сулейманан райондин Герейханован хуьруьн 1-отделенида, Жуьрэтлувилин ордендин кавалер Роберт Къазиагьмедован экуь къаматдиз бахшна, адан тIварунихъ галай стадиондал футболдай кьиле тухвай райондин турнир акьалтIна.
Райондин 1 ва 2-нумрайрин ДЮСШ-рин куьмекни галаз спортдин и серенжем тешкилнавайди райондин администрациядин физический культурадин, спортдин, туризмдин ва жегьилрин крарин рекьяй комитет тир.
Адан директор Надир Эфендиева чаз хабар гайивал, и турнирда райондин хкянавай 15 командадин футболистри чпин устадвал къалурна. Къугъунар са шумуд юкъуз давам хьана, абур итижлудаказ ва вини дережада аваз кьиле фена.
Къизгъин бягьсерин нетижада 1-чкадиз Герейханован хуьруьн 1-отделенидин команда лайихлу хьана. 2, 3 ва 4-чкаяр, талукь тирвал, Агъа СтIалрин, ЦIийихуьруьн ва Кьасумхуьруьн командайри кьуна.
Гъалиб хьайи командайриз ва къугъунра тафаватлу хьайи футболистриз турнирдин тешкилатчийри кубокар, дипломар ва къиметлу пишкешар гана.
«Лезги газет»
