2017-йисуз Дагъустандин суддин приставри буржар алай ксаривай 5,3 миллиард манат вахчуна. Им, алатай йисав гекъигайла, са миллиард манатдин артух я. И делилар алатай саласа юкъуз Россиядин ФССП-рин Дагъустанда авай Управленидин регьбер Низами Гьалимова журналистрихъ галаз кьиле фейи гуьруьшдал раижна.
“КIвалахдин пар гзаф хьунихъ галаз санал нетижаярни артух жезва. ИкI, гьахъ-гьисаб кьазвай вахтунда суддин приставри вири санлай 5,3 миллиард манат буржар вахчуна, имни, шазан талукь вахтунив гекъигайла, са миллиард манатдин артух я”, — лагьана Н.Гьалимова.
— Алиментрикай рахайтIа, и жигьетдай буржар алай ксари чпин яшар тамам тахьанвай аялрин хийирдиз гузвай пулдин такьатар суддин приставри и кар гужуналди кьилиз акъудиз тунин нетижада вахчунва. Иник гуьгьуьллудаказ гузвай алиментрин такьатар квач, амма а ксарни суддин приставри чпин гуьзчивиликай хкудзавач,-алава хъувуна ада.
Низами Гьалимован гафаралди, къенин юкъуз Дагъустанда алиментар гуникай кьил къакъудзавай 12 агъзур кас ава.
Къалурнавай девирда приставри 455 уголовный дело къарагъарна, абурукай 417-дай кьил акъудна акьалтIарнава.
Журналистри суддин приставрин кьиливай Махачкъалада ва республикадин амай шегьеррани законсуздаказ эцигнавай гзаф мертебайрин кIвалер чукIуруниз талукь месэладикайни хабар кьуна.
— Къенин юкъуз Дагъустанда законсуз эцигунрихъ галаз алакъалу яз чукIурна кIанзавай гзаф мертебайрин 42 кIвал ава. Абур вири чукIурда. И кар кIвалер эцигнавай ксарин такьатрин гьисабдай кьилиз акъудда. Вири и крари тIимил вахт къакъуддач, — къейдна Н.Гьалимова.
Адан гафаралди, мукьвал вахтара “Инстаграм” соцсетда ведомстводин махсус чина чукIурун лазим тир кIвалерин (анрай квартираяр маса къачун патал пулар ганвай ксариз и кардикай хабар жедайвал) шикилар ва видео пайда жеда.
— Кар анал ала хьи, и жуьредин гзаф кьадар кIвалер эцигзавай чIавуз абурухъ тайин адресар авач. Дагъустандин агьалийриз ихьтин объектар гьинра аватIа ва абурухъ галаз чпин алакъа авани-авачни чир жедайвал, чна ихьтин серенжемдикай менфят къачун кьетIна, — гъавурдик кутуна Н.Гьалимова. Ада гьакIни журналистривай и рекье чпиз куьмек гун тIалабна.
Пресс-конференциядал АЗС-риз талукь месэладикайни рахана. ЧукIуруник акатун лазим тир автозаправкаяр, Низами Гьалимован гафаралди, Дагъустанда авач, “чпин кIвалах вахтуналди акъвазарна кIанзавай ва я акъвазарун лазим тир автозаправкаяр авазва”.
«Лезги газет»
