Алатай саласа юкъуз Махачкъалада, “Дагъустан”  РИА-дин  конференц-залда, “Ачух гьукум” проектдин сергьятра аваз Россиядин Пенсийрин Фондунин (ПФР) Дагъустан Республикада авай отделенидин регьбер Мегьамед Исаев журналист­рихъ галаз гуьруьшмиш хьана. Ам и ведомстводин регьбервиле тайинарна алатнавай са йисалай артух вахтунда кьиле тухванвай кIвалахдал, исятда ПФР-дин республикадин отделенидин вилик  квай месэлайрал, халкь гъавурдик кутунин кIвалахда авай кимивилерал акъвазна.

Вичин рахунар М.Исаева  дагъустанвийри чпин ихтияррикай ва чеб патал тешкилзавай мумкинвилерикай менфят къачун тийизвайди къейд авуналди  башламишна. Республикада “Госуслуги” порталдин кIвалах къайдадик кватIани, адакай тамамдаказ менфят къачун тавун себеб яз, республикадин пенсийрин отделенида жезвай учиррикайни идахъ галаз алакъалу яз арадал къвезвай наразивилерикай рахана. Къенин юкъуз гьар са касдивай пенсиядиз (ам тайинаруниз, цIийикIа гьисабуниз ва икI мад), дидевилин капиталдиз (ам къачуниз, адан гьисабдай яз пулдин такьатрикай менфят къачуниз) талукь ва хейлин маса месэлаяр “Госуслуги” порталда, “Хсуси кабинетда” кьилиз акъудиз жезвайдал мад сеферда фикир желбна.

Мегьамед Исаев 143-нумрадин  ФЗ-да гьатнавай дегишвилерикайни рахана. Малум тирвал, 2017-йисан 1-январдилай къуватда гьатнавай и закондин бинедаллаз, чи уьлкведа государстводин ва муниципальный  къуллугърал кIвалахзавай ксар пенсиядиз экъечIунин вахт 6 вацран артух хьанва. И кьадар вахт алай йисалайни артухарнава. ИкI, 2018-йисалай винидихъ тIвар кьунвай ксар патал пенсиядиз экъечIзавай вахт, талукь тирвал, дишегьлийриз 56 ва итимризни 61 йис хьанва. Пенсийрин Фондунин РД-да авай отделенидин кьилин гафаралди, и кардин себеб чи уьлкведа  инсанрин уьмуьр яргъи хьунихъ ва 55-60 йисар тамам хьанвай ксаривай кIвалах активнидаказ да­вамариз алакьунихъ галаз алакъалу я. Инал лугьун лазим я, эгер гражданин государстводин ва муниципальный къуллугъдилай элячIайтIа, адазни, амай ксариз хьиз  (дишегьлидиз  — 55, итимдизни 60 йис хьайила), пенсиядиз экъечIдай ихтияр ава.

“Ачух гьукум” проектдин сергьятра аваз дидевилин капиталдиз талукь месэлайрикайни ва пенсияр вахтундилай вилик тайинарзавай ксарикайни  (абурукай чна газетдин виликан нумрайра галай-галайвал ганва) рахана.

Эхирдай журналистри М.Исаевазни пресс-къуллугъдин начальник Альбина Сункъулиевадиз сагърай лагьана.

Рагнеда Рамалданова