Са шумуд югъ идалай вилик Подмосковьедин Наро-Фоминск  шегьерда грэпплинг ва грэпплинг-ги жуьрейрай Россиядин Кубок патал акъажунар кьиле фе­на. Ана чи уьлкведин жуьреба-жуьре пи­пIе­рай тир гзаф кьадар спортсменри чпин устадвал къалурна.

Акъажунра иштиракай спортсменрин кьадар и сеферда мадни гзаф хьунал  тажубвалдай кар авачир, гьикI хьи, цIинин йисуз турнирда грэп­п­линг­дал машгъул тир виридавай иштиракиз жезвай. Идалайни гъейри, и  акъажунра гъа­­либвал къачуналди чпин устадвал тес­тикьарай гадайризни рушариз октябрдин эхирра Сербиядин меркез Бел­град ше­гьер­да кьиле фидай дуьньядин чемпионатда иштиракдай мумкинвал ава. Гьаниз килигна, иштиракчийрин арада еке конкуренция авай, бягьсерни къизгъиндаказ кьиле фена.

Россиядин Кубок къазанмишун патал устадвал къалурайбурун ва гъалиб хьайи­бурун арада спортдин и жуьредал фадлай машгъул жезвай ва вичихъ агалкьунарни авай чи ватанэгьли  Расул  Мамедбеговни  (грэпплинг-ги жуьредай, 77 кг-дин заланвал авайбурун арада) авай. Ада буьруьнждин медаль къазанмишна.

РикIел хкин: Р.Мамедбегова и акъа­жунра алатай йисузни иштиракнай ва Россиядин Кубок къазанмишнай. Ам грэпплингдай Европадин чемпионвилин (2020-йис) тIварцIин сагьиб, дуьньядин чемпионатдин гимишдин призёр, Россиядин спортдин международный классдин мастер я. Агалкьунар  адахъ  спортдин  маса  жуьрейрайни ава.

Рагнеда  Рамалданова