Чи ватанэгьлияр — гьар сана

Кьезил атлетикадал машгъул лезги спортсмен  Займудин  Асадулагьович  Семедов  дагъустанвийрин арада фадлай машгьур я. Ада вичин зирингвални кIубанвал яргъал мензилриз чукурунин марафонра иштиракуналди успатнава. Ам яргъал мензилриз чукурунин жигьетдай рекордсмен я. Кьезил атлетикадал адан рикI 5-классда кIелза­вай чIавуз (2000-йис) ацукь­на.

Займудин 1989-йисуз Хасавюрт райондин ЦIийи Къурушрин хуьре дидедиз хьана. Мектеб куьтягьай 2006-йисуз ам Махачкъаладин промышленностдинни экономикадин колледждин юридический факультетдик экечIна, кьуд йисуз ана чир­вилер къачуна. 2010-2012-йисара ада яракьлу кьушунрин жергейра къуллугъ кьилиз акъудна. 2013-йисалай Займудин вичин хизанни галаз Москвадин областдин Балашиха шегьерда яшамиш жезва. Алай вахтунда ада Ко­ломна шегьерда чи ватанэгьлийри (Рустам Адигуьзелова, Агаджан Ади­гуьзелова ва Жават Меликова) кардик кутунвай “Дарстрой” заводда операторвиле кIвалахзава.

Ватандиз хтайлани ада атлетикадал машгъул хьун давамарзава, гьар сеферда, цIийи маршрутра чукуруналди, цIийи рекордар тайинарзава.

Зарафатдин кар туш, 2020-йисуз ада Хасавюрт райондин ЦIийи Къурушрин хуьряй Махачкъаладиз кьван (110 км) чукурна. ЦIи Махачкъаладай Грозныйдиз 170 километрдин мензилдиз зверна (Махачкъа­ладин жуьмя-мискIиндилай Грозныйдин жуьмя-мискIиндал кьван).

Зиринг дагъвиди чукурай маршрутар мадни ава: ЦIийи Къуруш — Къизляр, ЦIийи Къуруш — Калмыкиядин сергьят.

Алай йисан 16-февралдиз ада пуд юкъуз “Ата-бубайрин рехъ” лишандик кваз Докъузпара райондин дагълух Къурушрин хуьряй Хасавюрт районда авай ЦIийи Къурушдал кьван чукурунин ультрамарафон тешкилна. ХъуьтIуьн мишекъат береда 370 километрдин мензилдиз пуд юкъуз чукурун регьят кар туш.

Чукурунин серенжемар кьиле тухуналди, Займудин Се­ме­дова жегьилрин арада сагълам уьмуьрдин табли­гъат раижзава. Идалайни гъейри, ада вичин вилик Гиннессан ктабдиз акъудиз жедай цIийи рекорд тайинарунин макьсад эцигнава. Исятда адаз Москвадай Берлиндиз кьван ва я Моск­вадай Махачкъаладиз кьван (мензилар сад я — 2000 километрдив агакьна) чукурдай фикир ава. Ада их­тилат авурвал, эгер и мен­зил атIай­тIа, Гиннессан ктабда гьатдай мумкинвал жеда. Чна фикирзавайвал, вилик къастар эцигзавай жуьрэтлу дагъвидиз и мензилни муь­тIуьгъ жеда.

Къейд тавуна жедач, дагъви спортсмен Россиядин сергьятра чукурунин акъажунра къазанмишнавай агалкьунрай ганвай хейлин шабагьрин сагьиб я.

К.Ферзалиев