КIелунин шартIар
“Талибан” (Россияда къадагъа авунва) тешкилатдин векилри Афгъанистанда рушариз мектебда чирвилер къачунал эцигнавай къадагъа алудунин шартI раижнава. Идакай немсерин “SpiegeI” чешмедиз талибрин векилди ихтилатна.
Абурун фикирдалди, рушари мектебда кIелун патал сифте нубатда хатасузвал арадал гъун, хатасуз улакьарни кардик кутун герек я. Талибрин векилдин гафаралди, улакьар хатасузбур тирвиляй алай вахтунда рушари университетра кIелун давамарзава.
Амма талибрин векилди арадал гъана кIанзавай хатасузвал квекай ибарат ятIа, галай-галайвал ихтилатнач. И месэла гьялун патал диндин къуллугъчийрикай ибарат махсус комитет тешкилдайвал я.
Украинадин хийир
Гуржистандин виликан президент М.Саакашвилиди “Северный поток-2” газопровод тухунин кIвалахар акьалтIаруникди Украинадиз хьайи хийирдикай ихтилатна.
“Украинадихъ бес кьадарда хсуси газ ава. Им хъсан я, вучиз лагьайтIа, украинвийри чпин газ хкудда. Абуруз чпин газ кьенят ийиз чир жеда”, — лагьана ада. Саакашвилидин фикирдалди, “Северный поток-2” фад-фад кардик кутун Украина патал “хаталу я”.
Къейд ийин, мукьвара акьалтIарай “Северный поток-2” газопроводдиз Украинади аксивалзавай. Абуруз чпин газ маса гуналди жезвай къазанжи квахьунин къурхулувал ава. “Северный поток-2” алай йисан эхирра кардик кутадайвал я.
“Спутник Лайт” акъудда
Эрменистандин гьукумдарриз коронавирусдиз акси Россиядин “Спутник Лайт” вакцина уьлкведа акъуддай фикир ава, технологиядин жигьетдай гьерекатриз гьазурвилерни аквазва. Ихьтин фикир “Sputnik Армения” чешмедиз республикадин вице-премьер М.Григоряна малумарна.
Сиясатчиди коронавирусдин тIугъвалдихъ галаз женг чIугваз куьмек гунай Москвадиз чухсагъул малумарна. Адан фикирдалди, “Спутник Лайт” вакцина гьазурунин кIвалахар Россиядин пешекаррин гуьзчивилик кваз кьиле фида.
ГьакIан серенжемар
Америкави политолог Д.Дрезнера “Foreign Affairs” чешмедиз малумарнавайвал, США-ди Россиядиз акси яз кьиле тухвай санкцийрин сиясатди герек авачир, хийирсуз нетижаяр арадал гъана. Адан гафар “Лента.ру” чешмеди раижнава.
Адан фикирдалди, эхиримжи вахтара США-ди вичин къудратлувилин дережа квадарнава ва санкцийри ислягь агьалияр патал чIуру нетижаяр арадал гъизва. Гьа са вахтунда, ада алава хъувурвал, Россия ва Китай хьтин чIехи уьлквейрихъ экономикадин санкцийриз манийвал гун патал бес кьадарда ресурсар ава. Гьавиляй политологди датIана санкцияр малумаруникай кьил къакъудун ва дипломатвилин алакъаяр гуьнгуьна хтун хъсан яз гьисабзава.
Мусибатдин агьвалат
20-сентябрдин экуьнахъ Пермдин госуниверситетда студент Тимур Бекмансурова яракьдай гуьлле гуникди ругуд кас кьена.
“ТАСС” чешмеди къейдзавайвал, кьейибурун арада 66 йисан яшда авай дишегьли, 18-20 йисарин яшара авай кьуд руш ва са гада ава. Минздравди хабар гайивал, хасаратвилер хьайи 24 касдиз медицинадин куьмек гузва, абурукай 19 касдал гуьлледин хирер ала. Азарханада къаткурнавайбурун сагъламвилин гьал хъсан жезва.
Къейдзавайвал, гъиле яракь аваз вуздиз гьахьай студентди, са гафни лугьун тийиз, кисна гуьлле гузвай.
Гуьнгуьна хтуна
21-сентябрдилай Россияди Иракдихъ, Испаниядихъ, Кениядихъ ва Словакиядихъ галаз авиаалакъаяр гуьнгуьна хтуна. Идакай “Новости” РИА-ди хабар гана.
Нек менфятлу я
Англиядин Редингский университетдин алимри тестикьарнавайвал, гьар юкъуз са истиканда авай нек хъуни инсандин уьмуьр яргъи ийида. Пешекаррин фикирар “Express” чешмеди раижнава.
Алимри Великобританиядинни США-дин 2 миллион агьалидин сагъламвилин жигьетдай делилар кIватIна. Ахтармишунрин нетижада дуьздал акъуднавайвал, некIеди рикIин азардин хаталувал тIимиларуниз таъсирзава. Идалайни гъейри, некIеди холестериндин дережа агъузарзава.
Идалай вилик пегьризчи М.Гинзбурга малумарайвал, уьмуьр яргъи авунин карда F, Н ва К витаминрикай авай хийирдиз россиявийри дуьз къимет гузвач. Духтурдин гафаралди, къейднавай витаминри рикIинни дамаррин азарар еримлу хьунин вилик пад кьуниз хъсандиз таъсирзава.
Аялар патал
TikTok-дин Китайдин версиядин сагьибри 14 йисалай тIимил яшара авайбур патал материалриз килигунин вахтунал сергьят эцигнава. Гила аялривай гьар юкъуз 40 декьикьадилай гзаф вахтунда TikTok-да авай затIариз килигиз жедач. Сергьят эцигунин макьсад аялар герек авачир затIарикай хуьн я.
«Лезги газет»
