Бажарагълу педагог, журналист, писатель, жемиятдин мергьяматлувилин “Набат” (РБОО “Набат”) тешкилатдин кьил, РД-дин медениятдин лайихлу къуллугъчи Азизханов Алюсет Межмединович Дагъустандин Гьукуматдин “Баркаллу зегьметдай” (“За доблестный труд”) медалдиз лайихлу хьана.
15-сентябрдиз, Дагъустандин халкьарин Садвилин йикъан суварин сергьятра аваз, адав и шабагь Дагъустандин регьбер Сергей Меликова вахкана.
— Зегьметдиз лайихлу къимет гун рикIиз хуш жедай кар я, — лугьузва Алюсет Азизханова. — И шабагь — “Баркаллу зегьметдай” медаль — Дагъустандин халкьарин цIийи суварин юкъуз шадвилин гьалара, вични республикадин Кьил гьуьрметлу Сергей Алимович Меликован гъиляй къачуни зак ашкъи-гьевес, дамах кутазва. Медалдиз лайихлу хьайибурун арада муаллимарни духтурар, эцигунардайбурни жемиятдин деятелар, жуьреба-жуьре маса пешейрин сагьибар авай. Гьелбетда, абур вири чи ватанэгьлийрин, республикадин абадвал патал тир гьакъисагъ зегьметди садзава.
Хиве кьан, къад йисалайни артух девирда жемиятдин мергьяматлувилин тешкилатдиз регьбервал гуз, яшайишдин четин шартIара гьатайбур кIевяй акъудиз, абурун азадвални ихтиярар хуьз алакьай (и кардикай хъсандиз зи “На службе обществу” ктабда кхьенва) заз гьар жуьре шабагьар ава. Амма и медаль кьетIенди я. Лугьун хьи, республика вилик тухунин бинеда гьамиша инсанрин баркаллу зегьмет ава. Сергей Алимовича медалдиз лайихлу хьанвай вири пара хушдиз тебрикна, абуруз чими келимаяр лагьана.
А.М.Азизханов 1956-йисуз Ахцегь райондин Чеперин хуьре дидедиз хьана. Ана мектеб, ДГПУ-дин филологиядин факультет (1978) агалкьунралди акьалтIарна. Зегьметдин рехъ хуьре урус чIаланни литературадин муаллимвилелай, Ахцегь райондин “ЦIийи дуьнья” газетдин мухбирвилелай башламишна. 1990-2005-йисара ада “Дагъустан” ГТРК-дин редакторвиле, информациядин хилен заведующийвиле кIвалахна. 2000-йисуз жемиятдин мергьяматлувилин “Набат” тешкилат арадал гъана, къенин йикъалди адан кьиле акъвазнава. Алюсет Азизханова, гзаф йисара РД-дин Общественный палатадин активный член яз, адан председателдин сад лагьай заместителдин, Аппаратдин руководителвилин везифаяр тамамарна. Гьакъисагъ зегьметдай РФ-дин ва РД-дин Общественный палатайрин, РФ-дин журналистрин Союздин гьуьрметдин грамотайриз, ЮНЕСКО-дин ва журналистрин Союздин “Дагъустандин къизилдин къелем” премийриз лайихлу хьана. Адан зегьмет гьакIни “Ватандин вилик лайихлувилерай” 2-дережадин ордендин медалдалди, РД-дин Кьилин Гьуьрметдин грамотадалди, “РД-дин медениятдин лайихлу къуллугъчи” тIвар гуналди къейднава. Алюсет Азизханован къелемдикай “Говорит Махачкала” (1997), “Испытание трагедией” (2003), “Уроки дружбы” (2007), “На службе обществу” (2020) ктабар ва публицистикадин гзаф кьадар материалар хкатнава.
Мумкинвиликай менфят къачуналди, жуван патай республикадин милли сиясатдин ва динрин крарин рекьяй министерстводиз, “Лезги газетдин” редакциядин коллективдиз, руководстводиз (абуруз зи зегьмет акуна, къимет гана, государстводин шабагь гун патал къалурна), заз тебрикдин хуш гафар лугьунай сагърай лугьуз кIанзава, — алава хъувуна А.Азизханова.
Дашдемир Шерифалиев
