Гила дагъустанвийрихъ Махачкъаладин аэропортунай Тажикистандизни Крымдиз фидай мумкинвал хьанва. Малум делилралди, “S7 Airlines” авиакомпанияди республикадин меркездай Тажикистандин пуд шегьердиз рейсер ахъайнава. Душанбедиз — гьар гьафтедин хемис (самолет, йифен 11-даз 20 декьикьа кIвалахайла, цавуз хкаж жезва), Куляб ва Худжанд шегьерриз жуьмя йикъара физва.
Махачкъаладин аэропортунин пресс-къуллугъди хабар гузвайвал, и рейсерикай менфят къачузвай пассажирри самолетда ацукьдалди вилик аэропортунин къуллугъчийриз чпик коронавирус квачирди тестикьарзавай справкаяр къалурна кIанзава. 3 йис жедалди яшара авай аялриз и месэла талукь туш.
Къейд ийин хьи, Крымдиз физвай рейсер “UVTaero” авиакомпанияди ахъайнава. Крымдиз самолетар гьафтеда кьве юкъуз физва: хемисдиз йикъан 3-дан зураз ва гьяддиз йикъан 3-даз 10 декьикьа кIвалахайла.
«Лезги газет»
