10-сентябрдиз Дагъустандин хуьруьн майишатдин ва суьрсетдин министр Баттал Батталов ва адан заместитель Зураб Къуччаев государстводин “Хуьруьн мулкар комплекснидаказ вилик тухун” программа кьилиз акъудзавай гьаларихъ галаз таниш хьун патал Ахцегь райондиз мугьман хьана.
“Лезги газетдиз” министерстводин пресс-къуллугъди хабар гайивал, мугьманар Ахцегьа эцигзавай спортдин комплексдиз фена. Къейдна кIанда, и объект республикада чIехибурукай сад яз гьисабзава. Ам гегьенш залдикай, тамашачияр ацукьдай паюникай, баскетболдин, волейболдин майданрикай, спортсменри парталар дегишардай чкадикай, паркингдикай… ибарат я.
Комплекс эцигиз 2020-йисуз гатIуннай. Алай вахтунда дараматдин кьве гьава (мансардани галаз), трибуна, спортдин майданар эцигна акьалтIарнава. Пудратчи карханадин регьбердин гафаралди, эцигунар кьиле тухузвай чIавуз са жерге четинвилерал ацалтна. И кар себеб яз тамамарзавай кIвалахрин кьадар ва къимет гзаф хьана. Ихьтин гьаларизни килиг тавуна, исятдани объектдал гьа са пудратчи карханади кIвалахзава.
Баттал Батталова проектда къалурнавайбурулай алава тамамарнавай кIвалахрикай гегьеншдиз хабар гун ва абуруз талукь смета гьазурун тIалабна. Ада, пудратчи карханади алава кIвалахар хъувун патал харжнавай пулар арадал хкидайвал, республикадин гьукуматдиз чар кхьидайдакай хабар гана.
Ахцегь районда “Хуьруьн мулкар комплекснидаказ вилик тухун” программадин сергьятра аваз, спортдин комплексдилай гъейри, кIелдай 120 чка авай, кьве гьавадикай ибарат мектеб ва 60 чка авай аялрин бахчани эцигзава. Министр анрал эцигунрин кIвалахар кьиле физвай гьалдихъ галазни таниш хьана. Малум хьайивал, аялрин бахчадин дарамат эцигна саки акьалтIарнава. Гьамни кьве гьавадинди я. Мектеб алай йисан эхирра ишлемишиз вахкун фикирдиз къачунва.
Агьмед Магьмудов
