Алатай гьафтеда СтIал Сулейманан райондиз РД-дин Гьукуматдин Председателдин Сад лагьай заместитель Батыр Эмеев, Дагсельхозстройдин регьбер Мегьамед Юсупов, республикадин карчивилин ва инвестицийрин Агентстводин кьилин везифаяр вахтуналди тамамарзавай Хаджи-Мурад Абашилов ва масабур мугьман хьана. “Лезги газетдиз” муниципалитетдин администрациядин пресс-къуллугъди хабар гайивал, ина абур инвестицийрин “СтIалрин багълар” проект кьилиз акъудзавай гьаларихъ галаз таниш хьана.
Мугьманар райондин кьил Нариман Абдулмуталибовахъ галаз санал проект кьилиз акъудзавай майдан авай “Полоса” агрохолдингдиз фена ва чкадал инвестордин векилрихъ, чилел зегьмет чIугвазвай лежберрихъ галаз рахана.
Агрохолдингдин векилдин гафаралди, ихтилат физвай проектдин сергьятра аваз 2000 гектардин мулкара ичин ва шуьмягърин багълар кутун фикирдиз къачунва. Къенин юкъуз багълар кутунвай майданар 900 гектардилай алатнава. Алай йисуз мад 120 гектарда ичин, 400 гектарда шуьмягърин къелемар цадайвал я. 2026-йисалди инвестордиз багълар кутунвай мулкарин кьадар, санлай къачурла, 2075 гектардив агакьариз кIанзава. Къейд ийин хьи, ина Италиядай ва Бельгиядай гъанвай хъсан бегьер гудай жинсерин къелемар цазва.
Дигидай цин месэлани агрохолдингди тамамдиз гьялнава. Хуьруьн майишатдин карханада Израилдин технологийрин бинедаллаз арадал гъанвай стIал-стIал яд гудай махсус къурулушдикай менфят къачузва.
Инвестордин векилри хабар гайивал, багълар кутунвай мулкариз мукьва 50 агъзур тонндив агакьна емишар хуьдай махсус дарамат (плодохранилище) эцигун къарардиз къачунва. Эцигунар са шумуд патал пайдайвал я. Сад лагьай пай къведай йисуз акьалтIарна, кардик кутаз кIанзава.
ЧIехи инвестпроект кьилиз акъудзавайбур са жерге татугайвилерални ацалтзава. Абурун арада рекьер къайдадик, дигидай яд бес тахьун, алава энергиядин игьтияж ва маса месэлаяр ава. Са кьадар крар кьилиз акъудун патал инвестордиз государстводин патай куьмек герекзава. Кьилди къачуртIа, 10 000 кВт гужлувал авай трансформатордин подстанция эцигунин, электричестводин симер тухунин, 12 километрдин мензилда къир цунин, 1 млн куб гьакьдай цин вирер арадал гъунин крара.
Батыр Эмеева агрохолдингди кьиле тухузвай кIвалахриз, мумкинвилериз еке къимет гана. Республикадин Сад лагьай вице-премьердин фикирдалди, емишар хуьдай махсус чка эцигунихъ еке метлеб ава. Адан куьмекдалди чкадал гьасилнавай суьрсет Урусатдин ва къецепатан уьлквейрин базаррив агакьариз жеда.
“Аграриядин республика тир Дагъустанда ихьтин проектар кьилиз акъудуниз чна кьетIен фикир гузва. Алай вахтунда кархана кIвалахда бязи татугайвилерал ацалтзава. Пар чIугвадай улакьар фидай рехъ туькIуьрна, подстанциядин гужлувал артухарна кIанзава. И месэлайра чун куьмек гуз алахъда. Проектдихъ еке гележег ава ва ам вилик физва. Ина къенин юкъуз 1500 гектарда ичерни шуьмягъар цанва. Им куьмек, фикир гана кIанзавай чIехи зегьмет я”, — лагьана Батыр Эмеева.
Къейд ийин хьи, проект РД-дин Гьукуматдин Председателдин Сад лагьай заместителди вичин гуьзчивилик кутунва.
«Лезги газет»
