Кьилин редактордин гаф
Къенин юкъуз лезгийрихъ яшайишдин жуьреба-жуьре хилера кIвалах кьиле тухузвай жемиятдин цIудралди тешкилатар ава. Мисал яз, мергьяматлувилин фондарин, милли медениятдин автономийрин, ассоциацийрин, союзрин ва маса кIватIалрин тIварар кьаз жеда. Абур чи хуьрерани районра, Дагъустандин ва Урусатдин жуьреба-жуьре шегьерра, гьатта къецепатан уьлквейрани кардик ква. Бязибуру чпин кIвалах халкьдин гегьенш къатариз малум жедай къайдада тешкилнава, бязибур авайдакай садазни хабар туш…
Махачкъалада, лезги халкьдин векилри кьил кутуна, имам аш-Шафиидин тIварунихъ галай мискIин (ам республикадин хуьруьн майишатдин ва суьрсетдин министерстводин дараматдин кьулухъ гала) ахъайнавайдакай, ада кьиле тухузвай кIвалахдикай са шумудра “Лезги газетдиз” макъалаяр акъатнай. Гьеле мискIиндин виликан имам, рагьметлу Тажидин гьажи Къазибеговал чан аламаз, и мискIиндин патав медениятдинни марифатдин макан арадал гъуникай рахунар, ихтилатар хьанай. И месэла веревирд авун патал Махачкъалада са шумуд сеферда чи халкьдин векиларни кIватI хьанай. Арадал гъиз кIанзавай центрадин гьакъиндай чпин фикирар Дагъустандин милли сиясатдин ва динрин крарин рекьяй министр Энрик Муслимова, генерал-майор Шамил Асланова, жемиятдин деятелар тир Гьасен Балатова, Шихсефи Сефиханова, Ставрополь шегьердин Думадин депутат Казбег Агъаларова, алим, Москвадин физико-технический университетдин муаллим Азим Нуьгьова, “Лезги газетдин” кьилин редактор Мегьамед Ибрагьимова, журналист Руслан Къурбанова, архитектор Андрей Агъабалаева, карчияр тир Сиражудин Къазибегова, Жабир Азаева, Шагьпаз Асаханова, ФЛНКА-дин, “Леки” фондунин, Кьиблепатан Дагъустандин жегьилрин Союздин векилри, хейлин масабуру лагьанай. Вирида центр арадал гъунин тереф хвенай, адан важиблувал къейднай. Амма, жуьреба-жуьре себебар аваз, и месэла сакIани тамамдиз гъиле кьаз жезвачир. Эхирни, халкьдин арада лугьудайвал, мурк юзана…
Алай йисан гатун эвел кьилера чи халкьдин са десте векилар мад сеферда санал кIватIна ва цIийиз арадал гъизвай тешкилатдин сифтегьан уставдихъ галаз таниш хьана. Гуьруьшдин вахтунда бязибуру уставдик кухтун хъувуна кIани бязи теклифар гана, меслятар къалурна. Гьанал центрадин директордин везифаяр “Лезги газетдин” кьилин редактор Мегьамед Ибрагьимовал ихтибарнавайдакай малумарна. Алай вахтунда тешкилатдин устав гьазурна акьалтIарнава. Къе-пака ам Дагъустандин юстициядин министерствода регистрация ийидайвал я.
КIелзавайда суал гун мумкин я: и кьадар тешкилатар аваз, цIийиди арадал гъунин игьтияж авани? Ам амайбурулай квелди тафаватлу жеда? Гьахълу суалар я. Бубайрин мисалда лугьузвайвал, сад-кьве цIам хаз регьят жеда, са шумуд цIамуникай ибарат кул хаз — четин. Чи халкьдин жемиятдин алава са тешкилат хъхьуникай зарар ваъ, гзаф хийир ава. Гьар са цIийи затIунихъ, кардихъ, гьерекатдихъ вичин цIийивилерни жеда. Ихтилат физвай центрадин кьетIенвилерикай сад ам я хьи, ада гьа са вахтунда диндин, тарихдин, медениятдин, марифатдин жигьетдай кIвалах тухуда. Адан тамам тIвар ихьтинди я: “Алкьвадар Гьасанан тIварунихъ галай медениятдинни марифатдин центр” АНО. ЧIехи арифдардин тIварунихъ ягъун дуьшуьшдин кар туш. Малум тирвал, Гьасан эфендиди, чи халкьдин арада диндин, тарихдин, медениятдин, марифатдин жигьетдай кIвалах тухуналди, вичин тIвар несилрин рикIера тунва.
Центрадихъ Махачкъалада хсуси дарамат жеда. Алай вахтунда ам эцигунив эгечIунин месэлаяр веревирдзава. Ана чи халкьдин тарихдизни медениятдин ирсиниз талукь музей, ктабхана, спортдин, гуьруьшар кьиле тухудай, мугьманар кьабулдай залар, лезги, араб, ингилис чIаларай тарсар тухудай кабинетар ва маса чкаяр жеда. Тешкилатди лезги районрани хуьрера, чи ватанэгьлияр яшамиш жезвай шегьерра диндиз, хайи чIалаз, тарихдиз, медениятдиз талукь мярекатар (конкурсар, олимпиадаяр, форумар, фестивалар, семинарар, мекераяр, выставкаяр, конференцияр, гуьруьшар) тешкилда. Гележегда районра, шегьерра, къецепатан уьлквейрани центрадин филиалар ахъайдай, кIвалахдин сергьятар мадни гегьеншардай ниятар ава. Гьа ихьтинбур я и кар гъиле кьунвайбурун къастар, мурадар, макьсадар.
Гьелбетда, инсанди вуч арадал гъиз хьайитIани, а карди вахт, зегьмет, къуватар, мумкинвилер истемишда. Садлагьана са затIни арадал къведач. И дуьшуьшдани гьакI я. Кьилинди, Аллагьдин куьмекдалди сад лагьай кам къачунва. Гуьгъуьнлай къачудай камарни берекат галайбур, регьятбур жедайдак умудар кутазва.
Гьуьрметлу газет кIелзавайбур! ЦIийиз арадал гъизвай тешкилатдин жигьетдай куь фикирарни чир хьанайтIа, кIанзавай. Белки, куь арада теклифар гудайбур, меслятар къалурдайбур, и кIвалахдик къуьн кутадайбур ава. Абур квевай “Лезги газетдин” редакциядиз рекье туртIа жеда.
Мегьамед Ибрагьимов
