Чи ватанэгьлияр — гьар сана
Илимда, медицинада, медениятда, эдебиятда, спортда, карчивиле, устIарвиле ва маса хилера чпин виниз тир алакьунар къалурзавай жегьилрикай чав мукьвал-мукьвал шад хабарар агакьзава. Москвада яшамиш жезвай Давуд Ирбиевич Кельбихановни спортда машгьур хьанвай лезгийрикай сад я.
Ам 1994-йисан 10-ноябрдиз Москвада дидедиз хьана. Адан диде-бубадин ери-бине Мегьарамдхуьруьн райондин Гъепцегьрин хуьряй я.
Аял чIавалай спортдал (джиу-джитсу) машгъул хьана. 12 йисан яшда авайла, ада Надир Наврузован регьбервилик кваз тайский боксдин сирер чирна. Къейд ийин, тежрибалу тренер Надир Наврузов машгьур спортсмен, спортдин алемда “Автомат” тахаллус акьалтнавай Гьажи Наврузован буба я.
Давуда жегьилрин арада тайский боксдай кIвенкIвечивал патал Москвада кьиле фейи акъажунра гъалибвилер къазанмишна. Гуьгъуьнлай ам ЦСКА-да боксдал машгъул хьана (14 йисан яшда авайла), спортдин и жуьредайни Москвада гъалибвал къазанмишна, Россиядин жаван хъсан боксеррикай сад хьана. Россиядин ва вири халкьарин пагьливанрин иштираквал авай хейлин акъажунра ада кIвен-кIвечи чкаяр кьуна.
Алатай йисара ам вад йисан муддатда Дубайдани яшамиш хьана. Москвада боксдай ада Россиядин чемпионвилин тIвар къачуна ва пешекар боксеррин жергеда хьана.
ММА-дани ада вичин гьунарар къалурнава. “Стрелка” проектда какахьай женгерай кьиле тухвай кьве бягьс ада, вичихъ галаз экъечIай спортсменар гьасирдал ярхаруналди, вахтунилай вилик акьалтIарна.
“Hardcore Fighting” спортдин тешкилатдин акъажунра Арутюн Самвелянахъ галаз тухвай сад лагьай бягьсина Давуда вич викIегь пагьливан тирди субутна: адалай вилик акьван фад нокаут кьилиз акъудай пагьливан хьанач. Эхь, гъалибвал къачун патал адаз сад лагьай раунддин 20 секунд бес хьана.
Гъутаралди кикIизвай бягьсерал рикI алайбурун арада Давуд гьасятда машгьур хьана. Танишри къейдзавайвал, Давуд ватанпересвилин руьгь квай пагьливан я, ада вич дагъви лезги тирди садрани рикIелай алудзавач, итимвилин хъсан чешнедалди ада халкьдин тIвар виниз хкажзава. Спортдин алемда “Стханский” тахаллус акьалтунини адан ватанпересвиликай хабар гузва.
Идалай вилик боксдал кьетIендаказ машгъул тиртIани, гила ада вич бегьлеяр алачиз гъутаралди кикIидай спортдин жуьредин пагьливан яз гьисабзава. Гьакъикъатдани, и рекьяй адахъ дамах ийиз жедай викIегьвални алакьунар ава. Алай вахтунда ада тренер Игорь Кокоеван регьбервилик кваз устадвал мадни хкажзава.
Гележегда какахьай женгерай (ММА) бягьсер кьиле тухудай ашкъи атайтIа, сифте нубатда ада чи ватанэгьли Амир Мурадован “Fight nights” лигада иштиракдайвал я. Къуй чи пагьливандихъ мадни зурба агалкьунар хьурай!
Куругъли Ферзалиев
