Мукьвара Дагъустандин Кьилин везифаяр вахтуналди тамамарзавай Сергей Меликова «Коммерсант» изданидиз интервью гана. Адан сергьятра аваз, республикадин регьберди Дагъустанда авай гьалрикай, яшайишдин жуьреба-жуьре рекьерикай, ришветбазвиликай, туризмдикай, экономикадикай гегьенш ихтилатар авуна. Адан гафарай якъин жезвайвал, республикада хъсан патахъ дегишвилер кьиле физва.

Чи газетдин хсуси мухбир Абдулафис Исмаилован фикирдалди, а дегишвилер сифте нубатда Да­гъустандин регьбер Сергей Меликова ва ада арадал гъинвай дестеди кьиле тухузва. «Сергей Алимович, чиновникрин докладрихъ яб акализ, ацукьай чкадилай буйругъар гуз, идара ийидай руководителрикай туш. Ам гьамиша халкьдин арада ава. Хуьрериз, шегьерриз физ, агьалийрихъ галаз гуьруьшра жезва, абурун дерди-гьал чир­зава. Гьа чка­дал­ гъил-гъилеваз месэлаярни гьял­зава.

Бязибуру фикирни авун мумкин я: вилик акъвазнавай сечкийрихъ галаз алакъалу ятIа? Ваъ,туш. Сергей Меликован кIва­лахдин къайда, тегьер гьа ихьтинди я. Им чаз ам республикадин руководст­водиз атай сифте йикъарилай аквазва. Идалай вилик, СКФО-да Пре­зидентдин векилвиле кIвала­хай девирдани. Куьне фикир гана­тIа, цIуд йи­саралди виликан руководителривай гьялиз тахьай ре­гиондин месэлаяр Сергей Алимовича куьруь девирда, вични тIугъ­вал­дин кризисдин вахтунда гьялзава. Гьелбетда, феде­ральный центрадин куьмек аваз. И кар чаз виридаз акуна кIанда. Дагъустандин кьил Сергей Меликован гьар йикъан гьакъикъи крари гьукум халкьдиз мукьва ийизва. Властриз халкьдин патай ихтибарвал хкизва», — къейдна А.Исмаилова.

«Лезги газет»