Къе-пака кардик акатда

Россиядин МИД-дин кьил С.Лаврова малумарайвал, “Северный поток-2” газопровод са шумуд йикъалай кардик акатда. Адан гафар “Интерфакс” чешмеди раижна.

“Са шумуд йикъалай кIвалахар акьалтIда ва ам кардик акатда”, — лагьана С.Лаврова.

Адан гафаралди, США-дин президентдин администрациядиз газопроводдин кIвалахар акъвазариз тежедайди чизва, амма ятIани акси рахунар давамарзава.

КичI кутазва

“Талибан” (ам Россияда къадагъа авунва) тешкилатдин боевикри Афгъанистанда чпиз аксивалзавайбур галайвал гуьллеяр ахъайзава. Ихьтин гьерекатралди абуру кIватI хьанвайбур чукIурзава. Идакай «Sputnik Афганистан» чешмеди хабар гана.

Бязи афгъанвияр гьар санихъ катзава, садбуру секинвилелди куьчейра къекъуьн давамарзава. Къейдзавайвал, талибри чпиз акси яз куьчейрал экъечIзавайбурун кьилелай гуьллеяр ахъайзава. Агьалийриз хасаратвилер хьанва лагьай малуматар гьелелиг авач. Чешмедин делилралди, талибриз аксивал къалуриз, агъзурралди афгъанвияр экъечIнава.

Къейд ийин, талибри Афгъанистанда цIийи гьукумат арадал гъун патал чеб гьазур тирди малумарнава.

27 декьикьада чирда

Россиядин ФМБА-дин (Федеральное медико-биологическое агентство)  физикадинни химиядин институтдин пешекарри ковид­ азар квани-квачни 27 декьикьада чирдай махсус прибор арадал гъанва. Идакай “Новости” РИА-диз ФМБА-дин алимди хабар гана.

“Спутник V” маса къачуда

Исламабаддиз Москвадивай “Спутник V”  вакцинадин агъа кIан 10 миллион доза маса къачудай къаст ава. “ТАСС” чешмедин делилралди, идан гьакъиндай Пакистандин Россияда авай векил Шавкат Алиди хабар гана.

Дипломатди къейд авурвал, векилханадин къуллугъчийри Россиядин ковиддиз акси рапар янава. Адан гафаралди, гьукумдарриз Исламабадда Россиядин “Спутник V” вакцина арадал гъиз кIанзава, алай вахтунда и месэла веревирдзава. Къейдзавайвал, Россиядин вакцинадиз уьлкведа еке къимет ганва.

Чешмедин делилралди, Перудани “Спутник V” вакцина арадал гъидай завод кардик кутадайвал я. Идакай 7-сентябрдиз анин президент П.Кастильоди ихтилатна. Адан гафаралди, Россиядинни Перудин гьукуматар завод ачухунин ва вакцина гьасилунин меслятдал атанва. “Вакцинация галачиз экономика тамамдаказ гуьнгуьна хутаз жедач”, — лагьана Кастильоди.

Алай вахтунда Россиядин вакцина 70 уьлкведа ишлемишзава.

Зеленскийдиз хвеши авуна

Украинадин президент В. Зеленскийди Америкадин конгрессдин векилрихъ галаз вичин уьлкведа гуьруьш кьиле тухвана. Идакай адан офисдин сайтда хабар ганва.

Гуьруьшдин вахтунда Зеленскийди, “Северный поток-2” газопроводдин кIвалахар себеб яз, Россиядиз акси санкцияр кутунай конгрессдин векилриз чухсагъул малумарна.

Конгрессдин векилри Украинадиз военный жигьетдай куьмекар гун хиве кьуна.

США-дивай куьмек тIалабзава

Украинадин къецепатан крарин министр Д.Кулебади “ICTV” телеканалдай хабар гайивал, уьлкведиз оборонадин жигьетдай США-дин куьмек герекзава. Адан гафар “Новости” РИА-ди раижнава.

Ада ихтилатайвал, В.Зеленский Вашингтондиз фейи вахтунда кьве уьлкведин президентри оборонадин жигьетдай амадагвал авунин икьрардал къулар чIугуна. Ада алава хъувурвал­, США-дин президент Байдена Украина текдиз тадач лагьана гаф ганва.

Амадагвилин серенжемар

Дагълух Къарабахда Азербайжандинни Туьркиядин военный рекьяй уртах вердишвилерин серенжемар башламишнава. Идакай Азербайжандин военный ведомстводин сайтда хабар ганва.

Серенжемар кьве уьлкведин арада военный рекьяй кутIунай амадагвилин икьрардин бинедаллаз тешкилнава. Кьилин макьсад дяведин гьерекатар санал тамамариз вердишарун, аскерар санал кIвалахдай къайдайрихъ галаз танишарун я. Чка вич дагълухди хьуниз килигна, алай аямдин техника четин шартIара ишлемишдай къайдаяр чируниз кьетIен фикир гудайвал я.

Июндин вацрани и кьве уьлкведин яракьлу къуватри  Нахичевандин автономиядин республикада санал военный махсус  серенжемар кьиле тухванай.

«Лезги газет»