9-сентябрдиз Дагъустандин Кьилин везифаяр вахтуналди тамамарзавай Сергей Меликова Вирироссиядин ватанпересвилин «Вахта Героев Отечества» проектдин иштиракчийрихъ галаз гуьруьш кьиле тухвана. Вичин рахунра С.Меликова къейд авурвал, тIвар кьунвай проектди акьалтзавай несилриз ватанпересвилин тербия гунин, абур экстремизм, терроризм тIегъуьнрикай, къанунсуз маса гьерекатрикай хуьнин карда важиблу роль къугъвазва.
Мярекатдин сергьятра аваз региондин кьили Ватан патал чан гайи кьегьалрин, алай вахтунда Ватандиз намуслувилелди къуллугъзавай игитрин жуьрэтлувилер къейдна.
Гуьруьшдал рахай гзафбуру акьалтзавай несилриз дуьзгуьн, ватанепересвилин тербия гунихъ вири жемият патал еке метлбе авайдакай лагьана. И жигьетдай вичин фикирар чи мухбирдиз галаз кьиле фейи интервьюда полковник Масуб Магьмудова раижна.
«Ватан. Хайи макан. Жуван ери-бине… Вири рикIиз чими ва хуш гафар я. Ватандихъ авай кIанивал сергьят авачирди я. Гьиниз вун акъатайтIани, хайи макандин гьар са пIипI, къекъвай куьчеяр, яд хъвайи булахар рикIяй акъатдач. Абур ара-ара ахварайни аквада.
Инсанривай ван жезва, газетрай кIелзава, гуя къенин несил хайи ерийрал, Ватандал са артух рикI алачиз чIехи жезва. Абуру, асайиш патал, Ватандин итижар маса гузва, къариблухдин дережа вине кьазва. Завай ахьтинбур авач лугьуз жедач, гьикI хьи, ацалтна зални гьахьтинбур. Амма абур лап тIимил я.
Заз аквазвайвал, алай вахтунда акьалтзавай несил ватанпересвилин руьгьдаллаз тербияламишунин месэла са кьадар гъиляй вегьенва.
Хайи Ватан хуьн, кIан хьун патал зегьмет чIугуна, аялриз дуьзгуьн тербия гана кIанда. И карда халкьдин машгьур векилар чешне яз къалурун герек я. Чахъ, гьи хел къачуртIани, тарифдай баркаллу рухваярни рушар ава. Абурун тIварар, агалкьунар школайра кIелзавай аялриз чир хьун лазим я. Аялрик ватан кIан хьунин руьгь сифте нубатда диде-бубайри, муаллимри кутуна кIанда. Авазва лезги кьегьалрикай кхьенвай ктабар. Гьайиф хьи, абур тIимил я», — къейдна М.Магьмудова.
«Лезги газет»
