“Лезги газетдиз” РД-дин Кьилин пресс-къуллугъди хабар гайивал, алай йисан сентябрдин вацра Мегьарамдхуьруьн районда гьайванар тукIвадай махсус комплекс кардик акатда.
Мукьвара Дагъустандин Кьилин везифаяр вахтуналди тамамарзавай Сергей Меликов и районда мугьманда авай чIавуз и комплексдиз фена, эцигунрихъ кIвалахрихъ галаз мукьувай таниш хьана.
Инаг инвестицияр желб авуналди эцигзава. Проект кьилиз акъудзавайди “Премиум” ООО я. Эцигунрин кIвалахриз, санлай къачурла, 60 млн манат пул акъатнава. ЦIийи карханади 15 кас кIвалахалди таъминарда. Комплексдин мумкинвилерикай рахайтIа, са сменада ина куьлуь карч алай — 650 ва ири карч алай 50 гьайван тукIваз жеда. Гьайванрин жендекар муркIада хуьн патал еке 5 холодильник эцигда. Санлай къачурла, анра 1500 жендек гьакьда.
Комплексдихъ республикадин экономика патал еке метлеб ава. Ада неинки са кьиблепатан районра, гьакIни Дагъустандин жуьре-жуьре пипIера авай малдаррихъ галазни кIвалахда. ЯкIукай рахайтIа, ам маса гун патал къецепатан уьлквейризни рекье твадайвал я.
Сергей Меликова комплексдиз еке къимет гана. Ада и кар гъиле кьунвайбурувай проект кьилиз акъудна акьалтIарунин жигьетдай гьалтзавай четинвилер аватIа жузуна. Комплексдин руководитель Рашид Сулейманова хабар гайивал, цIи як гьялдай тадаракар маса къачунихъ галаз алакъалу яз субсидияр авачир. Республикадин Кьили талукь идарайриз и месэладай кьил акъудунин буйругъ гана.
Гуьгъуьнлай Сергей Меликов Ярагъ-Къазмайрин хуьруьн мулкарал алай “ДКК-СТ” ООО-дин ципицIлухриз рекье гьатна. ЦипицIлухри 100 гектардив агакьна майданар кьунва. Ина жуьреба-жуьре сортарихъ галаз санал французрин “Уни-блан” сортунин ципицIарни битмишарзава.
Хуьруьн майишатдин карханади ципицIлухар 2011-йисуз кутуна. Шаз са гектардай 135 центнердив агакьна ракъинин кагьрабаяр кIватI хъувуна. Сезондин вахтунда ципицIлухра 150 касди кIвалахзава. Карханада датIана зегьмет чIугвазвайбурун кьадар 30-далай алатнава. Юкьван гьисабдалди са касди вацран къене 25-40 агъзур манат пул къачузва.
Къейд ийин хьи, райондин хуьруьн майишатдин векилрихъ галаз республикадин Кьили ципицIчивал вилик тухуниз, и хиле зегьмет чIугвазвайбуруз государстводин патай гузвай куьмекдиз талукь месэлаяр веревирдна.
Агьмед Магьмудов
