За “ЛГ”-дин 2021-йисан 33-нумрадай чи тIвар-ван авай журналист Мердали Жалилован “Низ сес гуда?” макъала дикъетдивди кIелна. Адан гзаф веревирдери зи фикир чпел желбна, зун сечкийрив гьикI эгечIун герек ятIа, хиялрикай хкудна. Эхь, сес гуз фена кIанда! Им чи буржи я. Амма низ сес гудатIа, журналистди къейднавайвал, гзаф сеферра алцумна кIанзава.
Сес гун патал чаз чи гележегдин депутат вуж ятIа чир хьун лазим тушни? Чаз аквазвайди цларал алкIурнавай сад-кьве плакат я, чпел халкь тухардай иер гафар кхьенвай. Садал “За пенсиядиз экъечIдай яшар сифтедай хьиз хъийида”, муькуьдал “Мажибар гзафарда”, пуд лагьайдал “Пенсионерар лазим кьадар пенсиядалди тухарда”, икI мадни къейднава…
Вучиз пенсионеррикай рахазва? Зегьмет чIугвадай, кIвалахдай чкаяр артухардай, чи заводарни карханаяр, еке майишатар арадал хкидай рекьерикай вучиз рахазвач? Халкь и ихтилатрикай икрагь хьанва. Рахун тIем акакьдай къиметрикай ийизва, гьа юкъуз базарда къиметар мадни багьа жезва. Ибур гьикI жезвай крар я? Вучиз халкь ажузарзавай ихьтин крариз рехъ гузва?
Эхь, депутатдин мандат гзаф ширин хьанва и девирда. Амма, мандат хьиз, закондин гьахъвални, халкьдин агьвални хвена кIанда!
Югъ-къандавай шейэрин къиметар са къатда хкажунилай гъейри, маса еке дегишвилер гъвечIи инсанриз, зайифбуруз аквазмач. Кьил хуьн къвердавай четин жезва. Пенсия — 10 агъзур манат. Идакай кьуд-вад агъзур кIвалерин гьакъидай хгайла, вуч амукьзаватIа, куьн килиг.
Журналистди партийриз тикъет янавач, гьим кIантIани хьурай, халкьдин игьтияжрихъ рикI кудайди хьун герек тирди къейднава.
Президентдизни, регионрин кьилеризни кIанзавайди гьунарлу, гъейратлу депутатрин тешкилатар тушни?
РикI канвай са яшлу дишегьлидиз депутатдиз вичин гьал-агьвалдикай, дердиникай лугьуз физ кIан жезва. И бейниванди шумудавай хабар кьуна, садазни депутат алай, авай чка чир хьанач. Депутат бес халкьдин арада хьун лазим тушни? Лагьана кIанда, чеб къени крар авуналди халкьдин арада машгьур депутатарни ава. Гзафбуру мергьяматлувилин серенжемар тешкилзава, кIевевайбуруз куьмекар гузва. Ахьтинбурукай чи газетдиз макъалаярни акъатнай. Аллагьди хуьрай чеб!
Мад сеферда тикрарзава: сес гуда чна, сес тагун уьмуьрдивай къекъечIун я. Сесер гуз физвайбурун кьадар тIимил ваъ, гзаф хьун лазим я…
“За низ сес гуда?” макъала кIелун, адакай дуьз нетижа хкудна, сес гуз фин вирибуруз меслят къалурзава.
М.Магьамдалиева,
зегьметдин ветеран
