Алатай гьафтеда Докъузпара райондин администрацияда муниципалитетда авай ЖКХ-дин объектар зулунни хъуьтIуьн девирдиз гьазур хьуниз талукьарнавай заседание кьиле фена. Райондин кьил Мегьамед Шамилован регьбервилик кваз кьиле фейи мярекатда “Ахтынские РЭС”-дин начальник Мегьамед-Гьуьсейн Гьасанова ва масабуру иштиракна.
Заседанидин сергьятра аваз веревирд авур месэлайрикай сад райондин мулкарилай фенвай электрический симер зулунни хъуьтIуьн арада къайдадик хьуниз талукьди тир. И месэладин важиблувал вичин рахунра М.Шамиловани къейдна. “И кардиз виликамаз гьазур хьунин нетижада чавай районэгьлияр патал къулай шартIар тешкилиз жеда. Энергетикадин объектрал кьиле тухузвай вири кIвалахар жезмай кьван фад акьалтIарна кIанда. Кьилинди абур зулунни хъуьтIуьн арада симерал ацалтзавай алава пар (нагрузка) эхиз жедай гьалда хьун я. Дагъдин мишекъат шартIар фикирда кьуна, бязи хуьрера кIвалериз, идарайриз чим гудай вахт адетдиндалай фад гатIундайвал я”, — рикIел хкана райондин кьили.
М-Гь.Гьасанован гафаралди, зулунни хъуьтIуьн девирдиз гьазурвал акунин сергьятра аваз электрический симер авай гьалдиз къимет гузва ва цIийикIа туьхкIуьр хъувун герек тир чкайрал талукь тир серенжемар кьабулзава. Ада хабар гайивал, алай вахтунда пешекарри Кьилер, Миграгъ, Къалажух ва Къуруш хуьрерин мулкара кIвалахзава.
“Ахтынские РЭС”-дин векилри къейд авурвал, Докъузпара райондин мулкарал цIийибуралди эвезна кIанзавай кьве линия ава. Гьар садан яргъивилел тахминан 15 км ала. Асул гьисабдай абурун куьмекдалди Къаракуьре ва Къуруш хуьрерив экв агакьзава. Линияр дегишаруни электрический симерихъ галаз алакъалу пис гьалар арадал атунин вилик пад кьада.
Заседанидал малум хьайивал, гьазурвилер акунин сергьятра аваз Къалажух ва Теки хуьрера къайдадикай хкатдай гьалда авай трансформаторарни электрический линийрин даяхар цIийибуралди эвезун фикирдиз къачунва.
«Лезги газет»
