11-сентябрдиз республикадин меркезда хуьруьн майишатдин суьрсетдин нубатдин мекера ахъа жеда. Идакай “Лезги газетдиз” Дагъустандин хуьруьн майишатдин ва суьрсетдин министерстводин пресс-къуллугъди хабар гана.
РикIел хкин, алатай сеферда (14-августдиз) кьиле фейи мекерадиз РД-дин Кьилин везифаяр вахтуналди тамамарзавай Сергей Меликов мугьман хьанай. Ам маса гузвай недай-хъвадай суьрсетдин еридихъ, къиметрихъ галаз мукьувай таниш хьанай ва мекерадиз гъанвай метягьрин жуьреба-жуьрвили гьейранарнай. Гьа чIавуз республикадин Кьили ихьтин мекераяр Махачкъалада мукьвал-мукьвал тешкилдайдакай хабар ганай.
Нубатдин мекера, алатай сеферда хьиз, Пушкинан тIварунихъ галай куьчеда кьиле фида. Муьштерийривай ина базардин къиметрилай ужуз хъсан еридин суьрсет маса къачуз жеда. Лагьана кIанда, мекерадиз метягьар асул гьисабдай дагълух хуьрерай гъизва ва абур, арачияр авачиз, суьрсет гьасилзавай лежберри маса гузва.
Къейд ийин хьи, мекера тешкилзавайбурун арада РД-дин хуьруьн майишатдин ва суьрсетдин, РД-дин промышленностдин ва алишверишдин министерствояр, Махачкъала шегьердин администрация ава.
«Лезги газет»
