30-августдиз Дагъустандин Гьукуматда РД-дин вице-премьер Абдулмуслим Абдулмуслимован регьбервилик кваз зулунни хъуьтIуьн вахтунда биоресурсар телеф тахьун патал “Широкольский комбинат” ООО-дин вирер цивди ацIурунин месэлайриз талукьарнавай совещание кьиле фена.
Алай вахтунда карханадин вирериз яд Каргалинский цин узелдай ахъайзава. Амма 2021-йисан 15-сентябрдилай 2022-йисан 1-апрелдалди и узелдал цIийикIа туьхкIуьр хъувунин кIвалахар кьиле тухудайвал я. Идахъ галаз алакъалу яз, анай вахтуналди яд ахъайиз жедач.
Совещанидин сергьятра аваз “Широкольский комбинат” ООО-дин вирер целди таъминарунин жигьетдай са шумуд рехъ веревирдна. Абдулмуслим Абдулмуслимова теклифнавай рекьерин менфятлувал тайинарун патал махсус десте тешкилунин ва, чкадал фена, гьалар ахтармишунин буйругъ гана.
Мярекатда РД-дин тIебиатдин ресурсрин ва экологиядин министр Р.Гьамидова, “Широкольский комбинат” ООО-дин директор А.Шайхулисламова ва масабуру иштиракна.
«Лезги газет»
