Россияди иштиракда
Афгъанистандин жигьетдай РФ-дин махсус векил, РФ-дин МИД-дин Азияда авай кьвед лагьай департаментдин директор Замир Кабулова къейд авурвал, Афгъанистан гуьнгуьна хтунин проектрик Москвадини пай кутада. Адан гафар “Новости” РИА-ди раижнава.
Векилдин гафаралди, исятда ахьтин проектра иштиракиз Москва гьазур я. “Къал-къиж авай Афгъанистандин яшайишдинни экономикадин гьалар къайдадик кухтунин алахъунра иштиракиз гьазур тирвиликай чна гьамиша лагьайди я. Ингье гьа макъам мукьва жезва”, — къейдна З.Кабулова.
Ада тагькимарзавайвал, США-ди Афгъанистандин сергьятра авиациядин ягъунар давамарун мумкин я. Пентагонди Афгъанистандин мулкарай чпин кьушунар тамамдаказ эхкъечIнава лагьана тестикьарнава. Америкадин аскерар ана 20 йисан муддатда хьана. Исятда Кабулдин аэропорт “Талибан” (Россияда къадагъа авунва) тешкилатдин гуьзчивилик ква.
Къейд ийин, 15-августдиз боевикрин тешкилатди Афгъанистандин мулкар тамамдиз чпин гуьзчивилик акатнавайдакай малумарнай. Гьа юкъуз Афгъанистандин президент А.Гани къуллугъдилай элячIна ва уьлкведай катна.
Шойгуди къимет гана
РФ-дин оборонадин министр Сергей Шойгудин фикирдалди, Афгъанистанда авай гьалар татугайбур я. Ада Кабулдай Россиядин ва маса уьлквейрин ватандашар ахкъудунай летчикризни духтурриз сагърай лагьана. Идакай “Новости” РИА-ди хабар гана.
Къейдзавайвал, чандилайни гъил къачуна, инсанар Афгъанистандай катиз алахъзава. Министрди рикIел хкана хьи, уьлкведин Президент Владимир Путинан тапшуругъдалди самолетри неинки Россиядин, гьакI Къиргъизиядин, Тажикистандин, Белоруссиядин ва Узбекистандин ватандашар хаталувал авай республикадай ахкъудна.
Туристар ахъайдач
Евросоюзди чпин кIватIалдик акатзавай уьлквейриз коронавирусдин жигьетдай хаталувал авай ругуд уьлкведай — США-дай, Израилдай, Косоводай, Ливандай, Черногориядай ва Кеферпатан Македониядай — туристар ахъай тавунин теклиф ганва. Идакай “CNN” чешмеди хабар гана.
Чешмедин делилралди, и теклиф кьилиз акъудун ва я акъуд тавун гьар са уьлкведин вичин ихтиярда ава. Къейдзавайвал, садакай масадак фад-фад акатзавай “Дельта” штамм ковиддиз акси раб ягъ тавунвай америкавийрин арада гегьеншдиз чкIизва.
Алакъаяр атIуник хийир квач
Донбассдин рекьяй арадал гъанвай Киевдин делегациядин пресс-секретарь ва Украинадин президентдин офисдин регьбердин меслятчи А.Арестовича Россиядихъ галаз алишверишдин алакъаяр атIун Украина патал менфятлу туширдакай лагьана. Ихьтин фикир ада “Украина 24” телеканалдиз малумарна.
Ада къейд авурвал, алишверишдин жигьетдай хъсан алакъаяр авай уьлквейрикай Россия Украинадин вад лагьай чкадал алай амадаг я. “Эгер чна вири и рекьер агалайтIа, цIийи къайдаяр ва серенжемар кардик кутуртIа, суал арадал къведа: нетижаяр гьихьтинбур жеда?”.
Зеленскийдин меслятчиди Иранни Ирак мисал яз гъана: 80 йисуз женг чIугунатIани, и уьлквейри дипломатвилин алакъаяр атIанач. Гьа са вахтунда ада Украинади Россиядилай тIимил аслу хьунихъ ялзавайдакайни лагьана. Виликдай алишверишдин жигьетдай Россия Украина патал сад лагьай чкадал алай амадаг тирди рикIел хкана.
Фадлай гьялнавай месэла
Украинадин гьукумдарри Крымдиз талукь яз чпин фикирар дегишарна, им нукьтIа эцигнавай месэла тирди абур гъавурда акьунва. Ихьтин фикир РФ-дин МИД-дин кьил Сергей Лаврова малумарна. Адан гафар “Новости” РИА-ди раижна.
Лаврован гафаралди, Крымда, Донбассда, Донецкий ва Луганский областра кьиле фидай сечкийри Украинадин гьукуматдик къалабулух кутун лазим туш, вучиз лагьайтIа, а мулкар Киевдин гьукумдаррин гуьзчивилик квач.
“Крымдин месэла гьялнавайди я, и жигьетдай чна фадлай вирибур гъавурдик кутунва, зун инанмиш тирвал, вирибуру, гьа жергедай яз Украинадин регьберрини аннамишнава”, — къейдна С. Лаврова.
Идалай вилик Россиядин МИД-дин регьберди В.Зеленскийди урус халкьдиз талукь яз авур ихтилатар миллетрин арада къал-къиж твазвайбур яз гьисабнай. Кьилди къачуртIа, августдин эвел кьилера Украинадин президентди урусриз “Россиядиз хъфин ва ана чпиз чка жагъурун” теклифнай.
“Дельта” хаталу я
Алимри тестикьарнавайвал, коронавирусдин Индиядин штамм Британиядиндалай кьве сеферда гзаф хаталу хьун мумкин я. Идакай Англиядин жемиятдин здравоохраненидин къуллугъдин ва Кембридждин университетдин пешекарри хабар гана. Абурун ахтармишунрин нетижаяр “The Iancet” журналда чапнава.
Пешекарри ковид акатнавай 43,3 агъзур кас ахтармишна.
«Лезги газет»
