“Лезги газетдиз” Дагъустандин МЧС-дин пресс-къуллугъди хабар гайивал, алай йисан гатуз республикадин мулкарал гьуьле ва вацIара чуьхуьнагарзавай 31 кас телеф хьана. Абурукай 7 аялар тир.
Са шумуд югъ идалай вилик Дербент районда са итим батмиш хьана. Югъ арадай фейила, Избербаш шегьерда 3 кас санал гьуьлуьз аватна. Батмиш жезвайбуруз куьмек гуз алахъайбурувай анжах са кас къутармишиз хьана. Муькуьбурун мейитар гуьгъуьнлай жагъун хъувуна.
РФ-дин МЧС-дин РД-да авай Кьилин управленидин векил Юсуп Супьянован гафаралди, августдин вацран эхиримжи йикъара республикада гьуьле батмиш жезвайбурун кьадар садлагьана артух хьана. И кардин кьилин себеб ам я хьи, гзафбуру къутармишдай махсус къуллугъар авачир чкайра чуьхуьнагар ийизва. Малум тирвал, официальный вири пляжрал батмиш жезвайбуруз куьмекзавай пешекаррин десте, герек техника ава, са жерге маса шартIарни тешкилнава. Амма бязибуру гьуьлуьн артух кас квачир чкайрал чуьхуьнагар авун хкязава. Нетижада бедбахтвилин дуьшуьшарни пара жезва.
Аялар телеф хьунин кьилин себеб абур диде-бубайри чпин гуьзчивиликай хкудун я.
Ю.Супьянован гафаралди, гьуьлел еке лепеяр алай чIавуз эсиллагь циз гьахьна кIанзавач. Ихьтин вахтунда батмиш хьунин игьтималвал (вероятность) гзаф я.
«Лезги газет»
