Чи ватанэгьлияр — гьар сана
Михьи ва чIехи рикI хьунилай гъейри, духтурвилин пеше хкязавайбур гьунарлувилеризни гьазур ксар хьун герек я. Анжах гьакъисагъвили, намуслувили ва, гьелбетда, пешедин рекьяй датIана чирвилерни тежриба артухарунихъ къаних хьуни духтурдин асуллувал къалурда.
Инал къейднавай ерияр вичиз хас тир духтуррикай сад уьлкведин меркезда алакьунарни агалкьунар аваз кIвалахзавай чи ватанэгьли Мегьамедтагьир Гьажимурадович Гьажиев я.
М. Гьажиев 1995-йисан 11-июлдиз СтIал Сулейманан райондин Эминхуьре дидедиз хьана. 2012-йисуз хуьруьн юкьван мектеб акьалтIарна. Гележегда духтур хьунин фикир рикIе авай жегьил 2013-йисуз Дагъустандин госмедуниверситетдик экечIна ва 2019-йисуз анаг акьалтIарна. Студент тир вахтара кIелунрихъ галаз санал республикадин психиатриядин азарханада медбратвиле кIвалахни авуна.
Хъсан чирвилер къачуналди вуз куьтягьай ва сифтегьан тежриба кIватIай жегьил пешекар уьлкведин меркездиз рекье гьатна, РМАПО-да (Российская медицинская академия непрерывного профессионального образования) хирургиядин рекьяй ординатурадик экечIна.
2019-йисалай Мегьамедтагьир Гьажиева Москвада кардик квай психиатриядинни наркологиядин “Корсаков” клиникада дежурный духтурвилин къуллугъдал кIвалахзава. Хирургиядин рекьяй чирвилер къачурдалай кьулухъ, 2021-йисалай, Москвадин 2-нумрадин государстводин поликлиникада хирургвиле кIвалахзава.
Чирвилер къачунин рехъ тежрибадихъ галаз санал давамарзавай жегьил духтурди алай вахтунда РУДН-дин (Российский университет дружбы народов) ультразвуковой хирургиядин кафедрада кIелун давамарзава.
Ам илимдин са кьадар кIвалахрин автор я, ада Москвада кьиле физвай бязи конференцийра, гьар гьафтеда форумра иштиракзава. Гележегда адахъ хирургиядин УЗИ-дин, диагностикадин рекьяй кIвалахдай фикир ава. Идалайни гъейри, алай вахтунда ада медицинадин илимрин кандидатвилин диссертациядин винел кIвалахзава.
Медицинадин рекьяй куьмекар кIанзавай ватанэгьлияр Мегьамедтагьир духтурдин патав мукьвал-мукьвал физва. Ада онлайн къайдада хийирлу меслятралдини вичин танишриз, багърийриз ва масабуруз алакьдай куьмекар гузва. Азад вахтунда ам спортдал, шикилар ягъунал машгъул жезва.
Хъсан гележег авай духтур гьам кIвалахдин, гьамни илимдин рекьяй вини дережайрив агакьуник чна умуд кутазва.
К.Ферзалиев
