“Лезги газетдиз” ФЛНКА-дин пресс-къуллугъди хабар гайивал, 14-августдиз Кьилбепатан Дагъустанда “ЧIехи бубайрин рехъ. РичIадин кьегьалрин югъ” лишандик кваз тешкилай мярекатдин сергьятра аваз са десте дагъвияр балкIанрал алаз ва улакьра аваз Кьурагь райондин Гелхенрин хуьряй Агъул райондин РичIа хуьруьз фена.

Тарихдай малум тирвал, 1239-йисан 20-октябрдилай 15-ноябрдалди РичIадин женг кьиле фенай. А чIавуз дагъвийрин гъвечIи дестеди саки вацран къене кьадардал гьалтайла чпелай са шумуд сеферда гзаф тир монголрин кьушунрин хура дурум ганай.

Мярекат Агъул райондин ва Кьурагь райондин Гелхенрин хуьруьн администрацийрин куьмекдалди ФЛНКА-ди ва Москва шегьерда авай агъулрин диаспоради тешкилнавай. И кардик гьакIни цIахуррин ва табасаранрин милли медениятдин автономийрини къуьн кутуна.

Лагьана кIанда, Кьиблепатан Дагъустанда ихьтин мярекат сад лагьай сеферда кьиле фена. Ам РичIадин кьегьалрин къагьриманвилиз ва дагъви халкьарин арада авай дуствилиз бахшнавай.

Иштиракчийрин арада ФЛНКА­-дин, агъулрин диаспорадин, “ЛЕКИ” фондунин векилар, Гелхенрин хуьруьн кавха Зураб Камалдинов ва масабур авай.

Тешкилатчийрихъ Кьиблепатан Дагъустандин халкьарин арада авай дуствилин алакъаяр мягькемарунин ва тарих хуьнин макьсаддалди ихьтин мярекатар инлай кьулухъни кьиле тухудай фикир ава.

Агьмед  Магьмудов