Бегьер — 2021
Дагъустанда зулун магьсулрин бегьер кIватI хъувунин кIвалах акьалтIарнава. Республикадин хуьруьн майишатдин ва недай суьрсетдин министерстводин сифтегьан делилрал асаслу яз, 93,7 агъзур гектардай 212 агъзур тонн техил вахчунва, им алатай йисан кьадардилай 3 процентдин гзаф я. Юкьван гьисабдалди, республикада техилрин бегьерлувал са гектардай 22,6 центнердиз барабар хьана, имни алатай йисандалай са тIимил виниз тир кьадар я.
Виридалайни гзаф кьадар техил Хасавюрт районда кIватIнава. Ина тахминан 17 агъзур гектардай 42 агъзур тонн вахчунва. Кьвед лагьай чкадал Къарабудахкент район ала. Ина 9800 гектардай 22,3 агъзур тонн кIватIнава. Гуьгъуьна гьар сада 20 агъзур тонн бегьер вахчунвай Ногъай ва Къизляр районар ава.
“Алай йис, тIебиатдин ва гьавадин шартIарал гьалтайла, са кьадар муракабди тир. Кьурагьвилерни, маса жуьредин татугайвилерни хьана. Сифтени-сифте хуьруьн майишатдин суьрсет гьасилзавайбурун, ахпа муниципалитетрин властрин, министерствойрин къуватар вири сад авун себеб яз, алатай йисан кьадардилай артух бегьер вахчуз алакьна. Алай вахтунда техил цазвай майишатри чпин кIвалахда агротехнологийрал кIевидаказ амал авуниз виридалайни еке фикир гуз башламишнава”, — лугьузва РД-дин хуьруьн майишатдин ва недай суьрсетдин министрдин заместитель Шарип Шарипова.
«Лезги газет»
