И йикъара Дагъустандин жемиятдинни сиясатдин дарги чIалал акъатзавай “Замана” газетдин 100 йис тамам хьанва. “Лезги газетдин” редакциядин коллективди чи къелемдин дустариз, вири дарги халкьдиз и лишанлу вакъиа рикIин сидкьидай мубаракзава. Редакциядин къуллугъчийрихъ яратмишунрин рекье мадни еке агалкьунар хьун чи мурад я!
Тарихдай малум тирвал, дарги чIалал сад лагьай газет 1921-йисан августдин вацра чапдай акъатна. Сад лагьай редактордин везифаяр Сергокъала райондин Вини Махарги хуьряй тир Мегьамед Гьасанова тамамарна.
Жуьреба-жуьре йисара газетдин тIвар са шумуд сеферда дегиш хьана: “Дагъистанна Мухтарият”, “Шура Дагъистан”, “Дарккван”, “Дарган” ва масабур. Кьилин редакторар яз кIвалахайбурун арада дарги халкьдин тарихда кьетIен гел тунвай Мегьамед Далгат, Хизри Сулейманов, Ибрагьим Багомаев, Дагъустандин халкьдин писатель Агьмедхан Абу-Бакар, Абдулла Вагьидов, Мегьамед Мегьамедов, Гъазимегьамед Юсупов ва масабур авай. 2012-йисалай “Замана” газетдиз Арсен Гъазимегьамедович Юсупова регьбервал гузва.
Алай вахтунда “Замана” газет, “Лезги газет” хьиз, гьафтеда садра (хемис юкъуз) чапдай акъатзава. Тираж 3520 экземплярдиз барабар я.
«Лезги газет»
