И йикъара чи республикадин медицинадин хилен къуллугъчийрив еке хажалат агакьна. Яргъалди чIугур залан азардикди яшлу алим, медицинадин илимрин кандидат, кафедрадин доцент, зегьметдин ветеран Далгат Жамалудинович Мегьтиханов рагьметдиз фена.
Д.Ж.Мегьтиханов 1930-йисуз Кьасумхуьрел къуллугъчидин хизанда дидедиз хьана. Ина юкьван школа, Махачкъалада Дагъустандин госмединститут акьалтIарна (1954-йис).
Гьа чIавалай та вич рагьметдиз фидалди вири уьмуьр чи республикадин медицинадин илим вилик тухуниз, инсанрин сагъламвал хуьниз бахшна. Алимди — духтурди хкянавай хел инсандин бедендин кIарабриз хьайи хасаратвилер сагъаруниз, фад кIвачел ахкьалдар хъувуниз талукьди тир.
1967-йисуз Д.Мегьтиханова Москвадин 2-мединститутда ортопедиядинни травматологиядин хилерай илимрин кандитатвилин диссертация хвена. Дагъустандиз хтана, мад гьа вичи кIелай институтда кIвалах давамарна. Вири йисара адакай кафедрадин доцент хьана.
Саки 20 йисуз Д.Мегьтиханов РД-дин травмотологиядинни ортопедиядин илимдинни методикадин обществодин кьиле авай. Алим-духтур РД-дин Минздравдин штатдик квачир кьилин травматолог тир.
Адан къелемдикай 120-дав агакьна илимдин кIвалахар хкатна. ЦIийи пуд затI гьазуруниз лап хийирлу 27 теклиф гуниз талукь махсус патентар къачуна.
Далгат Жамалудиновичан яргъал йисарин гьакъисагъ зегьмет адаз “РД-дин лайихлу духтур” лагьай гьуьрметдин тIвар, “Зегьметдин ветеран”, “Баркаллу зегьметдай» ЧIехи Петрдин тIварунихъ галай, “Даггосмедакадемиядин вилик лайихлувилерай”, “РД-дин здравоохраненидин вилик лайихлувилерай» медалар, маса шабагьар гуналди къейднава.
Алим бубадин кар адан хва Мурада давамарзава. Чна рагьметлудан хизанриз, багърийриз, мукьва-кьилийриз, дериндай хажалат чIугунивди, башсагълугъвал гузва. Далгат Жамалудиновичан экуь къамат чи рикIера амукьда.
“Лезги газетдин” редакциядин коллектив.
