“Лезги газетдиз” Дагъустандин Кьилин пресс-къуллугъди хабар гайивал, 16-августдиз Сергей Меликов коронавирусдиз акси рапар ягъун патал Махачкъалада Е.Исинбаевадин тIварунихъ галай стадиондал кардик кутунвай пунктуниз фена. Республикадин Кьили пунктунин мумкинвилериз къимет гана ва медицинадин къуллугъчийрихъ, волонтеррихъ, рапар ягъиз атанвайбурухъ галаз рахана.
РикIел хкин, инаг коронавирусдиз акси рапар ягъунин кIвалах вилик тухун патал са вацран вилик ахъайнай. Йикъан къене ина 1500 касдивай рапар ягъиз жеда. Чкадал медицинадин къуллугъчийрикай ибарат мобильный 5 дестеди ва ДГМУ-дин студентриволонтерри кIвалахзава. Пункт дарманар хуьн, рапар ягъун патал герек къвезвай вири техникадалди таъминарнава.
РД-дин здравоохраненидин министр Татьяна Беляевадин гафаралди, кIвалах менфятлудаказ тешкилун патал пунктуна пуд зона арадал гъанва: вилив хуьзвай, регистрация ийизвай ва рапар язавай чкаяр. Ихьтин къайдади нубатар, рапар ягъиз атанвайбурун патай наразивилер хьунин вилик пад кьаз куьмекзава.
Авай делилралди, къенин йикъалди и пунктуна саки 2 агъзур касди тIегъуьндиз акси рапар янава.
РикIел хкин, коронавирусдиз акси рапар ягъун патал Дагъустанда къенин юкъуз 144 пункт кардик кутунва.
Гьа и юкъуз Сергей Меликов Махачкъала шегьердин клиникадин духтурханадизни фена. Ина Дагъустандин Кьил коронавирус акатнавайбур сагъар хъувун патал тешкилнавай шартIарихъ галаз таниш хьана, раб-дарман бес кьадарда авани, авачни ахтармишна, духтуррихъ галаз рахана.
Агьмед Магьмудов
