Квез чидани?
Жанавурар акьуллу ва дурум гудай вагьши гьайванар яз гьисабзава. Абур дуьньядин саки вири чкайра яшамиш жезва. Жанавуррин луж тамун маса гьайванар, гьатта инсанар патални хаталу я. “Тамун санитарар” лугьузвай и вагьшияр, бязи чешмейри тестикьарзавайвал, эхиримжи вахтара тIимил жезва. Ингье жанавуррикай са бязи итижлу делилар:
— Жанавурриз 7-8 километрдин мензилдайни сес къведа.
— Маса затI жагъун тавурла, бязи вахтара жанавурри леш неда.
— Жанавурар саки вердишариз тежедай гьайванар я, гьатта шараг чIавалай инсанрихъ галаз яшамиш хьайитIани.
— ТIуьн авачиз жанавурдивай 5-7 юкъуз дурум гуз жеда.
— Гишин чIавуз еке жанавурди са сеферда 8-10 килограмм як неда.
— И вагьшийрин лужуник 3-4 чIехи жанавурни жеда.
— Жанавурри йифен уьмуьр кьиле тухузва, са йифен вахтунда абурувай 70-80 километрдин мензил атIуз алакьда.
— Лужунин кьиле авай жанавур гьамиша кIвенкIве жеда.
— И гьайванрилай 4-5 метрдин кьакьандиз хкадариз алакьда.
— Жанавуррин ранг абур яшамиш жезвай чкадилай аслу я: къумлухда абур хъипивални фичIивал квайбур жеда, тама — рехибур, полярный районра — лацубур.
— И вагьшийривай са сятда 60-65 километрдиз чукуриз жеда.
— Чакъалар ва койотар жанавурриз мукьва гьайванар я.
— ТIебиатда жанавурри инсанрал тек-туьк дуьшуьшра гьужумда. Адет яз, гзафни-гзаф пехъи жанавурри гьужумда. Сагълам жанавурар инсандив гьеле-меле агатдач.
— Жанавурривай 15-20 километрдин мензилдай ни гьиссиз жеда.
«Лезги газет»
