“Лезги газетдиз” Дагъустандин здравоохраненидин министерстводин пресс-къуллугъди хабар гайивал, республикадиз и йикъара коронавирусдиз акси рапарин еке кьадар чара авунва: “Спутник V” — 53400, “ЭпиВакКорона” — 1440 ва “Спутник Лайт” 15 000 раб.
Министерстводин пресс-къуллугъдин делилралди, сифте нубатда рапар абур тIимил авай шегьерризни районриз рекье твадайвал я.
РикIел хкин, алай вахтунда Дагъустанда вакцинациядин 86 стационарни мобильный 56 пункт кардик ква. Махачкъалада агьалийриз къулай хьун патал Исинбаевадин тIварунихъ галай стадиондал, аваррин ва урусрин театррин, шегьердин кьилин майдандал алай ДГМУ-дин дараматда алава пунктар кардик кутунва.
Дагъустанвийривай вакцинациядин гьи пунктуна хьайитIани тIегъуьндиз акси раб ягъиз жеда. Раб язавай касдив паспортдин, полисдин ва СНИЛС-дин копияр хьун герек я. РикIел хуьх, коронавирусдин вилик пад кьунин карда виридалайни менфятлу рехъ адаз акси раб ягъун я.
“Лезги газет”
