Аялри, жаванри, гьеле мектебдин суьредамаз, чпин арада, кIелунрилай алатайла, гележегдикай, пешейрикай, абур къачун патал чпи вуч авуна кIандатIа, гьадакай ихтилатар, суьгьбетар ийида. Им тIебии кар я. Абуруз ухшар рахунар и макъалада вичикай ихтилат физвай Саругъланов Рустаман, Уружбегов Ашуран, Уружбегов Самиран, Алхасов Абдурагьиман ва маса жегьилрин арадани хьанай. Абурукай бязибуру чпин пешеяр аскервилихъни техникадихъ, информатикадихъ галаз алакъалу ийизвай.
Чпин фикир дуьзди яни, тушни чирун патал муаллимривайни хабарар кьадай. Абурун арадай Саругъланов Рустама вичиз техника, офицервилин пеше кIанзавайди, компьютердин технологияр гзаф бегенмишзавайди лугьудай. Акваз-такваз вахтар алатна. Рустама 2016-йисуз Курхуьруьн 2-нумрадин юкьван мектеб лап хъсандиз куьтягьна. Имтигьанрай виниз тир баллар къачуна.
Аттестат гъиле гьатай Рустама яргъалди фикирар хъувунач, лазим тир чарар гьазурна, Москвадиз лув гана. Ина ада Серпухов шегьерда авай Петр Великийдин стратегиядин метлебдин ракетайрин Военный академиядиз (ОРВА РВЕН) документар вугана ва гьана акъвазна, экзаменризни гьазурвал акуна. Ина жаван “РВСН-дин алакъадин системаяр ва такьатар” факультетдик экечIна. И факульетда адан стха Вагифани кIелнай. Рустама жавабдарвал лап рикIивай гьиссна, сифтедилай хъсандиз кIелна. Чирвилер деринбур къачуналди, 2021-йисан июндиз анаг куьтягьна. Къуьнерал лейтенантвилин рекIврекIв гудай къизилдин хьтин чинер алаз и йикъара отпускдиз хуьруьз хтанвай. Акур муаллимри, ярар-дустари, танишри Рустамаз военный академия куьтягьун ва рикIин мурадрив агакьун мубаракна.
Дерин чирвилер ва гьазурвал авай лейтенант гележегда къуллугъун патал Оренбургдин областдин Ясный поселокдиз рекье тунва. Вахъ мягькем сагъламвал, аскервиле агалкьунар хьурай, Рустам!
Райсудин Набиев
