Дагъустандин гьукумдарри тестикьарнавайвал, республикада 550-далай гзаф мектебар тамамдаказ ремонт герекзавай гьалда ава. РД-дин образованидинни илимдин министрдин везифаяр вахтуналди тамамарзавай Ягья Бучаеван гафаралди, республикадин мектебрикай пудай са пай цIийи хъувуна кIанзава.
Дагъустандин гзаф хуьрера 1950-1960-йисара эцигнавай мектебрин дараматар алай вахтунда лап иски хьанва, анра са бубат гьалдин шартIарни авач, гьатта чими ийидай тадаракарни лазим къайдадик квач.
6-июлдиз Россиядин просвещенидин министерстводи мектебар тамамвилелди ремонт авунин гьакъиндай арзаяр вугун патал вири регионриз кагъазар ракъурнава. Вад йисан муддатда Дагъустандин вири куьгьне мектебар цIийи хъийидайвал я.
“Алай вахтунда чи республикада 382 мектебди ремонтар авунин патахъай герек тир къайдада документар вуганва”, — лагьана Я.Бучаева.
Адан гафаралди, къейднавай программадин тахминан бюджетдин кьадар Дагъустанда 6 миллиард манатдикай ибарат я.
«Лезги газет»
