Са делил къейд тавуна жедач, шегьерра шадлух мярекатрин залра мехъерар авунал къадагъа эцигнавайвиляй, мумкинвал авай хейлинбуру абур гьаятра, хуьрера кьиле тухузва. Гьа са вахтунда тилитралди инсанар кIватI жезвай чкайра вирусдиз акси бязи такьатар, антисептикар гьакI “абур” паталди эцигзавай дуьшуьшар жезва. Амма ковид, сияпурвилериз, къайгъусузвилериз яб тагудай терс затI я. И кар бязибуру геж кьатIана. Гьакъикъат ашкара я: гьатта чпин хсуси духтурар, алимар, медцентраяр авай ксарни вирусдин вилик ажуз жезва.
Чаз аквазва хьи, сифтедай коронавирусдин фендигарвал аннамиш тийиз хьайи хейлинбур эхиримжи вахтара игьтиятлу хьанва. Ахьтин инсанри чпин танишрик, мукьвабурук азар акатайдалай, чеб коронавирусдин къармахрай ахкъатайдалай кьулухъ акси таблигъат тухузвайбурун фикирар инкарзава.
ТIугъвалдин гьужум республикада къизгъин хьанвайвиляй ватандашрик къалабулух акатзава. ИкI тирвиляй азардиз акси рапар язавайбурун кьадарни артух жезва. Коронавирус чукIунин вилик пад кьунин Оперштабди 4-августдиз раижай делилралди, республикада 257 575 касди вирусдиз акси рапар янава.
Кьиблепатан Дагъустанда коронавирусдин тIугъвалдин жигьетдай авай гьаларикай рахайтIа, Ахцегь районда эхиримжи гьафтеда ковид акатай 5 кас дуьздал акъудна. Муниципалитетда кьиле фейи совещанидал РД-дин Роспотребнадзордин Управленидин Ахцегь районда авай векил А.Касимова къейд авурвал, гъвечIи ва юкьван карчивилел машгъул ксари санитариядин рекьяй амал авуна кIани истемишунар гьисаба такьуникди, тIугъвалдин жигьетдай районда гьалар пис жезва.
Ахцегь райондин ЦРБ-дин кьилин духтур М.Мурсалова къейд авурвал, районда 2700-далай гзаф ксари рапар янава. Районда “Гам-КОВИД-Вак” вакцинадин 430 доза ава, са компонентдин “ЭпиВакКорона” — саки 100.
Докъузпара райондин ЦРБ-дин кьилин духтур Ш.Бухсаеван гафаралди, районда тIугъвалдин жигьетдай эхиримжи гьафтеда гьалар пис хьанва. СтIалжемдик азарлу хьанвай 29 кас дуьздал акъуднава, абурукай 13 стационарда сагъарзава. Коронавирус квай 2 кас малум я. Махачкъаладин, Дербентдин азарханайрив агакьарнавайбурни ава. Гьафтедин эвел кьилерин делилралди, районда 2114 касди ковиддиз акси рапарин кьве компонентни янава.
Мегьарамдхуьруьн районда, 2-августдин делилралди, 3439 касди коронавирусдиз акси рапар янава.
4-августдиз гайи делилралди, Сулейман-Стальский райондин ЦРБ-да стIалжемдикди азарлу хьанвай 28 кас къатканва. КIвалин шартIара духтуррин гуьзчивилик 119 агьали ква. Райондин администрациядин пресс-къуллугъди хабар гузвайвал, коронавирусдиз акси рапар янавайбурун кьадар районда 3100-дав агакьзава.
Кьурагь райондин ЦРБ-дин кьилин духтур А.Азимован гафаралди, районда алай вахтунда 11 кас медкъуллугъчийрин гуьзчивилик ква. Абурукай 6 кас коронавирус квайбурухъ галаз алакъаяр хьанвайбур ва 5 кас стIалжем хьанвайбур я. И вахтунда азарханада стIалжемди тади гузвай 6 кас къатканва. Алай гьафтедин эвел кьилерин делилралди, Кьурагь районда 2104 касди ковиддиз акси рапар янава. ЦРБ герек тир вири дарманралди таъмин я.
Пешекарри тестикьарзавайвал, тIугъвалдин винел гъалибвал къазанмишдай виридалайни важиблу ва таъсирлу рехъ сад я — ковиддиз акси рапар ягъун.
Л.Фетгьуьллагь
