26-июлдиз, Дагъустандин Конституциядин йикъан сергьятра аваз, РД-дин Кьилин везифаяр вахтуналди тамамарзавай Сергей Меликова Дагъустандин халкьдин шаир Расул Гьамзатован тIварцIихъ галай премияр вахкана.
ЦIи и премия кьве авторди къачуна: “Чубарук” ктабдай лезги шаир, Дагъустандин писателрин Союздин лезги сектордин регьбер Владик Батманова ва “ВиртIедин булахар” ктабдай аваррин шаир Тухбат Зургаловади.
РД-дин Кьилин пресс-къуллугъди хабар гайивал, гьар са автордив 150 агъзур манатдин кьадарда аваз пулдин такьатар агакьда.
Мегьарамдхуьруьн райондин Хуьрелрин хуьряй тир Владик Батманов “Билбил” ва “Чубарук” ктабрин автор, Ю.Хаппалаеван тIварцIихъ галай эдебиятдин премиядин сагьиб я. Адан шиирар басмадин жуьреба-жуьре такьатриз, шииррин кIватIалриз акъатнава.
“Лезги газетдин” редакциядин коллективди Владик Батмановаз и агалкьун мубаракзава.
«Лезги газет»
