Миллет къалурун теклифзава

Госдумада депутатри Россиядин паспортра миллет къалурун теклифзава. “Говорит Москва” радиоди хабар гузвайвал, идакай миллетрин крарин рекьяй Госдумадин комитетдин председатель И.Гильмутдинова ихтилатна.

Адан гафаралди, ватандашрин паспортра миллет къалурдай чка тайинарунин месэла комитетда са шумудра веревирдна. Къейд авурвал, Россияда яшамиш жезвай гъвечIи халкьариз чпин хсуси шагьадатнамайра миллет къалурна кIанзава.

Чешмедин делилралди, паспортда миллет кхьинин кар арадал хкунин патахъай идалай вилик Госдумадин депутат В.Милоновни раханай. Адан гафаралди, миллет къалурунин месэла паспортдин сагьибдин хушуналди авун герек я.

Къадагъаяр эцигзава

Азербайжандин гьукумдарри коронавирусдиз акси раб янавайвилин шагьадатнама гвачир ватандашриз 1-сентябрдилай ресторанриз, алишверишдин центрайриз, отелриз фин къадагъа авун кьетIнава. Идакай “Интерфакс-Азербайжан” чешмеди хабар гузва.­

Идалайни гъейри, зулун эвел кьилера вузринни колледжрин вири студентри ковиддиз акси рапар ягъун чарасуз серенжем яз тестикьарнава. 1-октябрдилай и истемишунар муаллимризни, фармацевтризни, ахтармишунрин институтрин, медидарайрин къуллугъчийризни талукь жеда.

Мад иштирак хъийидач

Лацу кIвале Иракдин премьер Муфтафа аль-Казымидихъ галаз­ гуьруьшмиш хьайи вахтунда США-дин президент Ж.Байдена Иракда тухузвай военный гьерекатар акъвазарнава лагьана­ малумарна. “Чна ана са гьихьтин ятIа военный тапшуругъра иштирак хъийидач”, — лагьана Байдена. Идакай “Новости” РИА-ди хабар гана.

Украинадиз куьмекзава

США-ди Украинадиз гьар йисуз 750 миллион доллар кьван пулдин куьмек гузва. Идан гьакъиндай “Радио Свободадиз” гайи интервьюда Европадинни Евразиядин месэлайрин рекьяй госсек­ретарь Ж.Кента малумарна.

“Белки, чи патай гьар йисуз ихьтин пулдин куьмекар агакьзавай кьуд ва я вини кьил вад уьлкве ава”, — лагьана Кента.

Ракетаяр тергна

Израилдин F-16 истребителри Сириядин сергьятра ахъаяй 2 ракета Россиядин ПВО-дин “Бук-М2Э” комплексри тергна. Идакай «Новости» РИА-ди хабар гузва.

Мидявалзавай терефар баришугъ хъувунин рекьяй Сирияда авай Россиядин центрадин векил, контр-адмирал В.Кулитядин гафаралди, Израилдин тактический истребителри, Сириядин цавун бушлухриз экъечI тавуна, Дамаскдин мулкара авай объектриз ягъунар кьуна. Россияда арадал гъанвай комплексрин куьмекдалди гьужумдин вилик пад кьуна.

100 йисан яшарин сир

Америкадин Ньюарк шегьерда яшамиш жезвай, 100 йис тамам хьанвай дишегьлиди вичин уьмуьрдин яргъивилин сир ачухна. «Newark Post» газетдин делилар “Лента.ру” сайтди раижна.

Дишегьлиди къейдзавайвал, ам садрани ахлакьсуз ва пис крарал машгъул хьанач. “Сагъламвал хуьн патал за са гьихьтин ятIа кьетIен крар ийизвач. Вуч гьатзаватIа, гьам незва за”, — лагьа­на яшлуда.

Адан гафаралди, кьил какадардай тапшуругъар гьялунал машгъул хьуни адан къанажагъдин хцивал хуьзва.

ТIугъвал

Россияда эхиримжи гьафтейра гьар юкъуз коронавирус акатзавайбурун кьадар 20 агъзурдалай гзаф я. Санлай къачурла, ковид­дикди чи уьлкведа 6 миллионни 200 агъзурдалай гзаф ксар начагъ­ хьана. Уьлкведин хейлин регионра бязи ватандашар патал коронавирусдиз акси рапар ягъун чарасуз серенжем яз тестикьарнава.

Россияда гзафни-гзаф Москвада, Москвадин областда, Санкт-Петербургда тIугъвалди гьужумзава. 5 миллионни зуралай гзаф ксар сагъ хъхьанва, 155 агъзурдалай гзафбур вирусдикди кьена.

Дуьньяда начагъ хьанвайбурун кьадар 200 миллиондив агакьзава. Азарлуйрин кьадар гзаф тир уьлквейрик США, Индия, Бразилия, Россия, Франция, Великобритания, Туьркия ва масабур акатзава.

АЭС-ар эцигдай къаст ава

Белоруссиядин президент А.Лукашенкодиз Россиядин мулкарал атомдин электростанцияр эцигун патал вичин пешекарар желбиз кIанзава. Идакай “БЕЛТА” чешмеди хабар гузва.

Адан фикирдалди, исятда республикада ядерный технологийрик алава гьерекат кутун чарасуз я, гьа жергедай яз Россиядин пешекаррихъ галаз санал кIвалахар кьилиз акъудуналдини. Сиясатчиди рикIел хкайвал, Курчатовский институтди, БелАЭС эцигдайла, Минскдиз куьмек ганай. Гила белорусривай атомдин проектар кьилиз акъудунин кIвалахра иштиракиз жеда.

“Лента.ру” чешмедин делилралди, исятда Белоруссияда авайди анжах са АЭС я. Амни Россиядивай къачунвай 10 миллиард доллардин кредитдихъ эцигнава.

«Лезги газет»