Мектебдиз фидай яш тамам хьанвай аялриз гьукуматдин патай гьар садаз 10 агъзур манат пул гуда. Госкъуллугърин порталдин куьмекдалди и такьатриз талукь арза гудай мумкинвал ава. ЦIуд агъзур манат 2003-йисан 3-июлдилай 2015-йисан 31-августдалди дидедиз хьайи аялриз (6-18 йисан яшара авайбуруз) талукь я. Гьатта аял цIи мектебдиз фидачтIани, эгер адан 6 йис тамам хьанватIа, и такьатар агакьда. Са сеферда гузвай и такьатар, мектебрин 9-классар куьтягьна, колледжрик, училищейрик экечIнавай, 18 йисалай артух яшар тамам тахьанвай жегьилризни талукь я.
Идалайни гъейри, цIуд агъзур манатдин кьадарда аваз пулдин такьатар сагъламвилин гьалдин мумкинвилерал сергьят алай, 18-23 йисан яшара авай, чпи умуми образованидин программайрай чирвилер къачун давамарзавай аялар авай хизанривни агакьда.
РД-дин кьилин МФЦ-дин идаради чаз малумарай делилралди, къейднавай такьатриз талукь арзаяр Госкъуллугърин порталди 15-июлдилай кьабулиз башламишнава. Арзаяр 2021-йисан 1-ноябрдалди ракъурдай ихтияр ава. Госкъуллугърин порталдай арза ракъурдайла, алава документар герек жезвач. Идалайни гъейри, агьалийриз пенсийрин фондунин отделенийрайни арзаяр вугудай ихтияр ава. Диде-бубадикай сада пенсийрин фондунай арза вугудайла, адав вичин паспорт, аял хайивилин гьакъиндай шагьадатнама, вичинни аялдин СНИЛС хьун герек я.
Диде-бубайривай вири аялар гьа са арзада къалуриз жеда, яни гьар са аялдин патахъай кьилдин арза вугунин чарасузвал авач.
Малумарзавайвал, пулдин такьатар хизанрив и йисан 16-августдилай агакьда.
«Лезги газет»
