Квез чидани?
Балугърин жуьреяр агъзурралди ава, абурун тамам гьисаб кьаз хьанвач. Бязибур чпин акунралди, уьмуьр кьиле тухунин саягъдалди тафаватлу жезва. Шикилдай аквазвай балугъни ажайиббурукай сад я. Пуд кIвач квайвиляй урус чIалал адаз “рыба-тренога” лугьузва. Садлагьана адакай штативдин ухшар къвезва. Абур Индийский, Атлантический ва Тихий океанрин лап дегьнейра яшамиш жезвай балугъар я.
Адан кIвачер асул гьисабдай сирнавунин лувар я, амма абурун куьмекдалди балугъри недай затIарни кьазва. Ишигъдин нурар хьиз аквазвай кIвачерин яргъивал метрдив кьван агакьзава, бедендин яргъивал — 30-40 сантиметрдив. Абур чIулав, мичIи-вили, экуь рангунинбурни жеда.
Итижлу делилрикай сад ам я хьи, кIвачер цин кIане атIумарна, и балугъдивай яд физвай патаз акси акъвазиз жезва. И кьетIенвал себеб яз ада са четинвални авачиз кIезрияр незва, яни кIезрияр чеб сивиз аватзава.
«Лезги газет»
